Almatylyqtar - QR tólemdi eń belsendi qoldaýshylar

ALMATY. QazAqparat - Almaty turǵyndary QR tólemdi qoldanýda kósh bastap tur. Bul týraly «Azamattarǵa arnalǵan úkimet» memlekettik korporatsııasynda málim etti, dep habarlaıdy QazAqparat tilshisi.

Vedomstvonyń dereginshe, 2021 jyly «Azamattarǵa arnalǵan úkimet» memlekettik korporatsııasy Kaspi jáne Halyq Bank-pen birlesip, HQO-larda memlekettik bajdy QR kómegimen tóleý servısin engizdi. Bir jyl ishinde qazaqstandyqtar QR kodty 700 myńnan astam ret suratyp, 2,8 mlrd teńgeden astam somaǵa tólem jasaǵan.
«Servıs engizilgen sátten bastap bólimderdegi kassalar júktemesi tómendedi. Klıentter ýaqytyn únemdep, operatordyń aldynda otyryp-aq qyzmet aqysyn tóleıdi ári QR kod arqyly tólem jasalǵanda komıssııa alynbaıdy», - dedi «Azamattarǵa arnalǵan úkimet» memlekettik korporatsııasy Almaty qalasy fılıaly dırektorynyń orynbasary Ásem Bolatbekova.

QR tólemdi belsendi qoldanǵandardyń ishinde Almaty qalasynyń (72 052) turǵyndary kósh bastap tur, ekinshi orynda qaraǵandylyqtar (63 278), odan keıin tizimde astanalyq turǵyndar (54 354).

QR kodtyń kómegimen memlekettik qyzmetterdiń baj alymyn eń az tólegender Atyraý (23 080) men Soltústik Qazaqstan oblysynyń turǵyndary (23 449).

Eske salsaq, Memleket basshysy 2021 jylǵy Joldaýynda memlekettik qyzmetterdi alý kezindegi problemalarǵa nazar aýdaryp, bul protsesterdi tolyǵymen tsıfrlandyrýdy tapsyrǵan bolatyn.

Sondaı-aq, «Azamattarǵa arnalǵan úkimet» memlekettik korporatsııasy keltirgen derekke sáıkes, QR kod arqyly tólem jasaý sııaqty servıster azamattardyń memlekettik qyzmetterdi alý retin jeńildetýge kómektesedi.
Qazir QR kodtyń kómegimen 146 túrli memlekettik qyzmettiń aqysyn tóleýge bolady. Bolashaqta bul tizim tolyqtyrylatyn bolady.
Aıta keteıik, QR kod arqyly memlekettik baj alymyn tóleý Kaspi jáne Halyq Homebank mobıldi qosymshalary arqyly qoljetimdi.