Almatylyqtar páter ıeleri kooperatıvterdiń jumysyna shaǵymdandy
Kezdesýge kelgen turǵyndar Almaly aýdanynyń PIK-terdiń jáne monopolısterdiń jumystaryna shaǵymdandy, sonymen qatar, ekologııany jaqsartý, qalada ómir súrý úshin jaıly jaǵdaılar jasaý jóninde paıdaly usynystar aıtty.
Almaly aýdany mádenı jáne qoǵamdyq ómirdiń tarıhı ortalyǵy bolyp sanalady. Aýdanda sý, jylý, káriz jáne elektr máselesi tolyq sheshilgen.
Ýrbanıstıka jáne jaıly orta máseleleri áli de ózekti bolyp otyr.
Aýdanda taǵy 18 km trotýar salý jáne halyqtyń múmkindigi shekteýli toby úshin 28 km joldy qaıta qalpyna keltirý qajet. 26 ýchaske mańyna syrtqy jaryq ornatylady, sonymen qatar 49 aýla aımaǵy men 68 kóshege qosymsha jaryq beriledi.
2020 jyly Almaly aýdanyndaǵy 192 aýla jóndeledi, qalǵan 52 aýla 2021 jyly jańartylady.
Jeke ınvestorlardyń kómegimen eski úılerdiń problemasy sheshilýde, aǵymdaǵy jyly aýdanda 7 eski úı súrilgen, 52 otbasy baspanasyn jaqsartqan. Jalpy, osy máseleni utymdy sheshý úshin qalalyqtardyń belsendilik tanytýlary jáne ınvestor usynǵan nusqa boıynsha biraýyzdan sheshim qabyldaǵandary jón.
Oqýshy ornynyń tapshylyǵyn joıý úshin Raıymbek dańǵyly men Tilendıev kóshesi boıynda 1000 oryndy mektep salý josparlanǵan. Aıta keterligi, keler jyly №144 mektep-gımnazııa janynan qosalqy nysan salý úshin qujattar ázirlenip jatyr.
Búgingi kezdesýde PIK-terdiń jumysyna jáne «Almatytelekom» kompanııasynyń baılanys qyzmetine kóp shaǵym aıtyldy. Degenmen, turǵyndar ekologııa men jasyldandyrýdy jaqsartý, onyń ishinde shyrsha baǵyn bólý boıynsha usynystaryn aıtty. Sonymen qatar, turǵyndar kóshelerdegi ýrnalardyń azdyǵyna, parkter men kóńil kóteretin oryndarda qaýipsizdikti qamtamasyz etýge nazar aýdardy.
Aýdan turǵyndaryn qoǵamdyq kóliktiń jumysy da tolǵandyrady. Almaty ákimi B. Saǵyntaev avtobýstar tapshylyǵy qala jáne jeke avtoparkter esebinen tolyǵatynyn atap ótti. Trolleıbýstardyń taǵdyry týraly qoıylǵan saýalǵa qala ákimi B. Saǵyntaev jaýap berdi.
« Trolleıbýstardyń jumysy toqtamaıdy. Bul qoǵamdyq kólik halyqqa qyzmet kórsete bermek. Tipti, keler jyly onyń baılanys jelileri men ınfraqurylymyn jańartamyz», — dedi Baqytjan Saǵyntaev.
Kezdesý sońynda, Baqytjan Saǵyntaev qalalyqtardy belsendi bolýǵa jáne qalany jaqsartý jumystaryna atsalysýǵa shaqyrdy.
