Almatylyqtar óz okrýginiń depýtatyna saıt arqyly qabyldaýǵa jazyla alady

ALMATY. QazAqparat - Almaty qalasynyń máslıhaty bir mandatty depýtattar boıynsha okrýgter kartasyn usyndy. Endi turǵyndar máslıhat saıtyndaǵy «Okrýgter kartasy» qosymsha betinde óz okrýginiń depýtaty týraly aqparatty ońaı kóre alady, dep habarlaıdy QazAqparat tilshisi.

Kartadaǵy árbir okrýg depýtat týraly tolyq málimettermen, sonyń ishinde onyń fotosýreti men baılanys derekterimen aıqyndalǵan. Saılaý okrýginiń shekaralary da belgilengen.

«Endi árbir turǵyn kartadan mekenjaıyn tańdap, óz depýtatyn taba alady. Sonymen qatar ótinish qaldyryp, jeke qabyldaýǵa jazylýǵa múmkindik bar. Bul qadam turǵyndar men saılanǵan depýtattar arasyndaǵy ózara baılanysty jaqsartý jáne tıimdilikti arttyrý úshin jasaldy», - dep atap ótti qalalyq máslıhat tóraǵasy Meıirjan Otynshıev.Aıtýynsha, okrýgter kartasy Almaty qalasynyń tsıfrlandyrý basqarmasymen birlesip ázirlendi.