Almatylyqtar onkologııa dárigerlerinen tegin tekseristen óte alady
ALMATY. 4 aqpan. QazAqparat /Ádilet Musahaev/ - Búkilálemdik qaterli isikke qarsy kúres kúnine oraı Almaty turǵyndary úshin tegin medıtsınalyq tekserý jumystary kórsetiledi.
Qalalyq onkologııalyq dıspanserdiń Bas dárigeri Dılıara Qaıdarovanyń aıtýynsha, 2011 jyldyń 5 aqpanynda saǵat 9:00 men 18:00 arasynda Almaty qalasynyń qalalyq onkologııa dıspanseri men Almaty oblysynyń oblystyq dıspanserinde qala jáne oblys turǵyndary úshin tegin medıtsınalyq tekseris júrgiziledi. «Al búgin «Mega - Almaty» SO-da Búkilálemdik qaterli isikke qarsy kúres kúnine oraı júrgiziletin, aqparattyq-aǵartý aktsııasy ótedi», -deıdi ol.
Onyń aıtýynsha, jyl saıyn elimizde 30 myńdaı qaterli isikke jańadan shaldyqqandar tirkelse, jyl saıyn 15 myńdaı adam osy dertten kóz jumady eken. «Qolaısyz ekologııa, sozylmaly stresster, qımyldyń azdyǵy jáne nashar ádetterdiń bolýy - qazirgi zaman ómiriniń ajyramas faktorlary qaterli isikterdiń paıda bolýyna sebep bolyp tur. Halyqtyń kóbi qazirgi kezde, qaterli isikter alǵashqy satylarda anyqtalǵanda 100% jaǵdaıda bul dertten tolyǵymen emdelý múmkindigi bar bolǵanyn bilmeıdi. Osydan 20-30 jyl buryn qaterli isikterdiń emi, sol dert sııaqty qıyn bolatyn. Búgingi tańda, jańa emdeý ádisteri buryńǵylardan álde qaıda tıimdi bolyp turyp, naýqastardyń sapaly ómir súrýine múmkindik beredi. Ókinishke oraı, bul dertpen mamandarǵa kesh jolyqqandardy emdegende, oń nátıjege jetý óte qıyn», -deıdi Bas dáriger.
D.Qaıdarova qazirgi medıtsına bul aýrýlardy tıimdi emdeý ádisterin taýyp, olardy resmı túrde maquldaǵandyǵyn aıtady. «Bul ádisterdiń bári de, Qazaqstan turǵyndaryna jetkilikti. Dáriger-onkologtardyń qorytyndysy boıynsha medıtsına jetistikteri adamdardyń qorqynyshy men nadandyǵy aldynda álsiz. Adamdardyń óz densaýlyǵynyń kúıi týraly eshteńe bilgisi kelmeıdi, kóbinese mamandarǵa kesh qaralady. Álemniń damyǵan elderinde qaterli isikterdi aldyn alý úshin jappaı júrgiziletin nasıhattaý sharalary, halyqtyń jyl saıyn óz betimen profılaktıkalyq baıqaýlardan ótýine sebep boldy», -deıdi ol.
«Qalalyq onkologııa dıspanser dárigerleri men «Qaterli isikpen kúreseıik» qoǵamdyq qordyń maqsaty - jalpy aqparat quraldary arqyly jappaı halyqtyń bul mańyzdy máselege nazaryn aýdarý arqyly, eldiń bul dertke kózqarasyn ózgertý. Halyqqa bul aýrýdyń alǵashqy belgilerin kútpeı, bul derttiń aldyn alý úshin dárigerlerge jolyǵýdy arqashan ýaǵyzdaý qajet», -deıdi Dılıara Qaıdarova.
