Almatylyqtar Naýryz meıramyn qalaı toılap jatyr

ALMATY. QazAqparat - Almatylyqtar áz Naýryz merekesin toılap jatyr, dep habarlaıdy QazAqparat tilshisi.

Kóktemniń shýaqty kúninde almatylyqtar kıiz úı tigip, ulttyq kıimmen kóshege qydyrýǵa shyǵa bastady.

Jibek joly kóshesine jınalǵan halyq qarasy qalyń. Shaǵyn sahnada Muqasan Shahzadaev, Maqsat Bazarbaev, Tahmına Áshimbekova, Іnjý jáne basqa otandyq estrada juldyzdary án shyrqady.

Sonymen qatar, «Almaty áýenderi», «Boztorǵaı» Halyqaralyq balalar festıvali kontserttik baǵdarlamasyn usynsa, dıdjeıler men ınteraktıvter jáne shyǵarmashyl jastar óz ónerlerin ortaǵa salady.

Qolóner jármeńkesi men sýretshiler kórmesi ótip jatyr.

Arnaıy balalar aımaqtary uıymdastyryldy.

Aıta keteıik, megapolıste negizgi merekelik sharalar 21-23 naýryz aralyǵynda ótedi. Qalanyń barlyq aýdandarynda 80-nen astam túrli is-shara josparlanǵan.

Búgin Memleket basshysy Qasym-Jomart Toqaev Almaty qalasynyń «Astana» alańyndaǵy merekelik is-sharaǵa qatysyp, barsha qazaqstandyqtardy Ulystyń uly kúnimen quttyqtady.