Almatylyqtar «Mızam» bazaryndaǵy konteınerlerdiń ornyna mektep salýdy talap etti
ALMATY. QazAqparat - Almatyda Alataý aýdanynyń turǵyndary "Mızam" bazary jalǵa alǵan jer telimine mektep salýdy talap etti. Turǵyndar búgin qala basshylyǵy men Almaty Qoǵamdyq keńes múshelerine osyndaı ótinishin jetkizdi, dep habarlaıdy QazAqparat tilshisi.
"Bizde mektep tapshy, al munda bul bıznesmender ózderiniń konteınerlik qalashyqtaryn salýǵa tyrysyp jatyr. Jalǵa berilgen jerdi qaıta alý kerek, bul bazar eshqandaı normalarǵa sáıkes kelmeıdi. Biz qansha jyldan beri surap kelemiz. Osy aýmaqta birneshe bazar ornalasqan, nege mektep salýǵa bolmaıdy?!", - dedi aqsaqal Saǵatul Taýbaldy.
Alataý aýdanynyń turǵyndaryn qoǵamdyq keńes músheleri qoldap, osy máseleni ózderiniń jaqyn otyrystarynyń birinde qaraýǵa ýáde berdi.
"Óte durys jáne ózekti usynys. Memleket basshysy óz joldaýynda balalar úshin mektep salýdy basty mindetterdiń birine qoıdy. Bıyl Alataý aýdany óziniń 10 jyldyǵyn toılaıdy. Aýdan qarqyndy damyp keledi, biraq ınfraqurylym tómengi deńgeıde. Búginde munda mektep tapshylyǵy aıqyn kórinedi. Osy jaǵdaılardyń barlyǵyn eskere otyryp, biz bul máseleni qoǵamdyq keńeske shyǵaryp, onyń sheshimine qol jetkizemiz", - dedi qala Qoǵamdyq keńesiniń múshesi Aleksandr Belıanov.
Búgin Qoǵamdyq keńes "Mızam" bazarynda kóshpeli keńes júrgizdi.
Onda qala belsendileri bazar basshylyǵynan barlyq anyqtalǵan zań buzýshylyqtardy dereý joıýdy jáne bazardyń jaǵdaıyn qoldanystaǵy zańnamaǵa tolyq sáıkestendirýdi talap etti.
Qoǵamdyq uıym ókili Dáýren Babamuratovtyń aıtýynsha, konteınerlerden quralǵan dúńgirshekter - ótken kúnniń sarqyny ǵana emes, adam ómiri úshin qaýipti dúnıe. «Bul keıipte bazar jumys jasamaýy kerek. Biz osy syqyldy nysandardy súrýmen aınalysatyn bolamyz. Mundaı qurylǵylardan qalany endi tazalaı bastaǵanda, bul jaramaıdy», - dedi ol.
Óz kezeginde "Mızam" kóterme-bólshek saýda ortalyǵynyń basqarýshy dırektory Bolat Qojaqov anyqtalǵan buzýshylyqtardy moıyndady.
«Ia, bizdiń tarapymyzdan zańbuzýshylyqtar boldy. Ýaqyt ótip jatyr. Ýaqyt - aqsha. Biz qurylysty bastadyq. Al qalalyq sáýlet-qurylys baqylaý basqarmasy bizge aıyppul saldy. Zań boıynsha konteınerlerden qurylys salýǵa tyıym salynbaǵan», - dedi bazar ókili.
Sonymen qatar, Almaty memlekettik sáýlet-qurylys baqylaý basqarmasynda kásipkerdiń dálelderimen kelispegen.
«QR Sáýlet qurylys qyzmeti týraly Zańynda konteınerlik tıptegi qurylystar adam kóp shoǵyrlanbaıtyn qarapaıym qurylys bolǵan jaǵdaıda ǵana saraptamaǵa berilmeıdi. Munda tehnıkalyq turǵydan kúrdeli, ári adam kóp shoǵyrlanatyn nysan. Nysannyń irgetasy, jumys jobasy bolýy tıis. Bul jerde másele adamdardyń qaýipsizdigi týraly bolyp otyr», - dedi qalalyq Sáýlet jáne qurylys baqylaý basqarmasynyń bólim basshysy Oljas Tólebaev.
