Almatylyqtar memleket menshigindegi jerge zańsyz qurylys júrgizilýine narazy
ALMATY. QazAqparat – Almatyda memleket menshigindegi ýchaskede zańsyz túrde qurylys jumystary júrgizilmek. Bul týraly qala turǵyndary áleýmettik jelide jarııalady. Osy oraıda, QazAqparat tilshisi quzyrly organdardan mán-jaıdy anyqtap kórdi.
Turǵyndar Áýezov pen Qurmanǵazy kósheleriniń qıylysyndaǵy jasyl aýmaqta zańsyz túrde qurylys júrgiziletinin aıtyp, dabyl qaǵady. Búginde ol jerge qorshaý da qoıylǵan.
«Ýchaskeni zańsyz túrde qorshap jatyr. Ol jer - memlekettiń menshigi. Tek, janyndaǵy kadastrlyq nómiri 20-311-014-227, aýmaǵy 0,0125 ga jer ýchaskesi ǵana menshikke berilgen. Endi jasyl aýmaqtyń qalǵan jerinde qurylys júrgizbek, sondaı-aq olar memlekettik menshiktiń qalǵan ýchaskelerin de basyp alǵan. Memlekettiń ýchaskesinen zańsyz qorshaýdy alyp tastaýdy, búkil jasyl aýmaqty qalaǵa qaıtarýdy talap etemiz», - dep jazdy olar.
Atalǵan másele boıynsha Almaty qalasynyń Jer qatynastary basqarmasy «QazAqparat» tilshisiniń saýalyna bergen jaýabynda kadastrlyq nómiri 20-311-014-227, aýmaǵy 0,0125 ga jer ýchaskesi «Halyqqa qyzmet kórsetýge arnalǵan ǵımaratty paıdalaný jáne oǵan qyzmet kórsetý» maqsatynda azamattyq-quqyqtyq mámile negizinde jeke menshik quqyǵymen jeke tulǵaǵa tıesili ekenin, ýchaskege jeke menshik quqyǵy 2002 jyly Almaty qalasy ákimdiginiń qaýlysymen berilgenin habarlady.
Al, Qala qurylysyn baqylaý basqarmasy kórsetilgen mekenjaı boıynsha qurylys-montajdaý jumystarynyń bastalǵany týraly habarlama túspegenin, sondaı-aq qurylys-montajdaý jumystary júrip jatpaǵanyn málim etti.
Qalalyq josparlaý jáne ýrbanıstıka basqarmasy derekter bazasyna sáıkes áleýmettik jelidegi sýrette kórsetilgen 2 jer ýchaskesine (№ 20-311-014-227, № 20-311-014-398) qandaı da bir joba aldyndaǵy qujattar berilmegenin habarlady.
