Almatylyqtar Medıtsınalyq saqtandyrý qoryna 99,5 mlrd teńge aýdarǵan

ALMATY. QazAqparat – 2017 jyldyń 1 shildesinen 2021 jyldyń 15 aqpanyna deıin el boıynsha Medıtsınalyq saqtandyrý qoryna 529,1 mlrd teńge tústi. Bul týraly búgin Almatyda ótken brıfıng barysynda «Áleýmettik medıtsınalyq saqtandyrý qory» kommertsııalyq emes uıymy Almaty fılıalynyń dırektory Tileýhan Ábildaev aıtty, dep habarlaıdy QazAqparat tilshisi.

Jarnalar men aýdarymdardyń kólemi jaǵynan Almaty qalasy kósh bastap tur – jınaqtalǵan somanyń besten bir bóligi burynǵysha, ońtústik astananyń enshisinde.

Jalpy, saqtandyrý júıesi iske qosylǵan 2017 jyldyń 1 shildesinen 2021 jyldyń 15 aqpanyna deıingi aralyqta Medıtsınalyq saqtandyrý qoryna Almaty qalasynan 99,5 mlrd teńgeden astam jarna aýdaryldy. Onyń 79 mlrd teńgeden astamy jumys berýshilerdiń jasaǵan aýdarymdary bolsa, qalǵan 20,5 mlrd teńge jeke kásipkerler men azamattyq-quqyqtyq kelisimshart boıynsha eńbek etetinderge tıesili. Sondaı-aq Almaty qalasy boıynsha 2019 jyl basynan beri ózin-ózi jumyspen qamtyǵan 197 myńnan astam adam 392,3 mln teńge kóleminde BJT tólegen», - deıdi Tileýhan Ábildaev.

Medıtsınalyq saqtandyrý qory osymen tórtinshi jyl qatarynan kepildendirilgen tegin medıtsınalyq kómek jáne medıtsınalyq saqtandyrý paketi sheńberinde kórsetilgen qyzmetterge aqy tólep keledi. 2021 jyly Almaty qalasy boıynsha qos paket boıynsha 186,8 mlrd teńge qarjy qarastyrylǵan. Onyń 109,5 mlrd teńgesi – TMKKK paketi, 77,3 mlrd teńge MÁMS paketine tıesili.