Almatylyqtar medıtsınalyq saqtandyrý qoryna 48 mlrd teńge aýdardy

ALMATY. QazAqparat - 2017 jylǵy 1 shilde men 2019 jylǵy 30 qarasha aralyǵynda Medıtsınalyq saqtandyrý qoryna 233 mlrd teńgeden astam qarjy jınaldy, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ Almaty qalalyq fılıalynyń habarlaýynsha, Almaty qalasy jarna men aýdarym kólemi jaǵynan respýblıka boıynsha kósh bastap tur.

«Jınaqtalǵan somanyń besten bir bóligi ońtústik astanalyqtarǵa tıesili. Jalpy, saqtandyrý júıesi iske qosylǵan 2017 jyldyń 1 shildesinen 2019 jyldyń 30 qarashasyna deıingi aralyqta Almaty qalasynan qorǵa 48 mlrd teńgeden astam jarna aýdaryldy. Onyń 45,5 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymy. Almaty boıynsha 1 mln 428 myń adamnyń atyna jarna túsken», - dedi fılıal dırektory Tileýhan Ábildaev.

Sondaı-aq, jyl basynan beri ózin-ózi jumyspen qamtyǵan 5136 adam 17,6 mln teńge kóleminde biryńǵaı jıyntyq tólem tólegen.

Esterińizge sala ketsek, biryńǵaı jıyntyq tólem elimizde 2019 jyldyń 1 qańtarynan bastap engizilgen bolatyn. Jıyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 protsentin quraıdy.

BJT – respýblıkalyq mańyzy bar qalalar úshin 1 aılyq eseptik kórsetkish (AEK) nemese 2525 teńge, aýyldyq jerler úshin – 0,5 AEK nemese 1263 teńge kóleminde belgilengen. Tólemniń bul túrin jaldamaly jumysshylardyń qyzmetin paıdalanbaıtyn, jeke tulǵalarǵa qyzmet kórsetetin jeke tulǵalar, frılanserler, santehnıkter, qurylysshylar, taksı júrgizýshileri tóleı alady.