Almatylyqtar medıtsınalyq saqtandyrý qoryna 139 mlrd teńge aýdardy
ALMATY. QazAqparat - MÁMS júıesi engizilgen ýaqyttan bastap Medıtsınalyq saqtandyrý qoryna 753,4 mlrd teńge tústi.
Bul týraly onlaın brıfıng barysynda «Áleýmettik medıtsınalyq saqtandyrý qory» kommertsııalyq emes uıymynyń Almaty fılıalynyń dırektory Tileýhan Ábildaev málim etti, dep habarlaıdy QazAqparat tilshisi.
Onyń aıtýynsha, 2017 jyldyń 1 shildesinen 2021 jyldyń 31 tamyzyna deıingi aralyqta almatylyqtar Medıtsınalyq saqtandyrý qoryna 139 mlrd teńgeden astam jarna aýdarǵan.
«Onyń 97,8 mlrd teńgeden astamy – jumys berýshilerdiń jasaǵan aýdarymdary. Qalǵan 41,2 mlrd teńge – jeke kásipkerler men azamattyq-quqyqtyq kelisimshart boıynsha eńbek etetinderdiń jarnasy»,- dedi «Áleýmettik medıtsınalyq saqtandyrý qory» kommertsııalyq emes uıymynyń Almaty fılıalynyń dırektory Tileýhan Ábildaev.
Sonymen qatar ol ózin-ózi jumyspen qamtyǵan azamattar úshin biryńǵaı jıyntyq tólem (BJT) tóleý tıimdirek ekenin jetkizdi.
«Qazirgi tańda qala turǵyndary úshin BJT kólemi 2917 teńgege teń, onyń 40% nemese 1166 teńgesi MÁMS jarnasyna jumsalady. 2019 jyl basynan beri Almaty qalasy boıynsha ózin-ózi jumyspen qamtyǵan 202 myńnan astam adam 524,6 mln teńge kóleminde biryńǵaı jıyntyq tólem tólegen»,-deıdi spıker.
