Almatylyqtar medıtsınalyq saqtandyrý qoryna 105,5 mlrd teńge aýdarǵan

ALMATY. QazAqparat -ALMATY. QazAqparat – 2017 jyldyń 1 shildesinen 2021 jyldyń 15 naýryzyna deıingi aralyqta medıtsınalyq saqtandyrý qoryna 562,8 mlrd teńge tústi. Bul týraly «Áleýmettik medıtsınalyq saqtandyrý qory» kommertsııalyq emes uıymynyń Almaty fılıalynyń dırektory Tileýhan Ábildaev málim etti, dep habarlaıdy QazAqparat tilshisi.

«Jarna kólemi jaǵynan jınaqtalǵan somanyń besten bir bóligi ońtústik astanaǵa tıesili. Jalpy, osy ýaqyt aralyǵynda Almaty qalasynan 105,5 mlrd teńgeden astam jarna aýdaryldy. Onyń 81,9 mlrd teńgeden astamy – jumys berýshilerdiń jasaǵan aýdarymdary. Qalǵan 23,6 mlrd teńge – jeke kásipkerler men azamattyq-quqyqtyq kelisimshart boıynsha eńbek etetinderdiń jarnasy», - dedi fılıal basshysy.

Sondaı-aq, Almaty qalasy boıynsha ózin-ózi jumyspen qamtyǵan 198 myńnan astam adam 412 mln teńge kóleminde BJT tólegen.

Esterińizge sala ketsek, saqtandyrý jarnasy Ulttyq banktegi esep-shotqa túsedi. Ári qaraı MÁMS paketi sheńberinde halyqqa kórsetilgen medıtsınalyq qyzmet aqysy retinde emdeý mekemelerine aýdarylady.

Medıtsınalyq saqtandyrý qory tegin medıtsınalyq kómek jáne saqtandyrý paketi sheńberinde kórsetilgen qyzmetterge aqy tóleıdi. 2021 jyly Almaty qalasy boıynsha 163 klınıkamen 186,8 mlrd teńgege kelisimshart bekitilgen. Onyń 74,9 mlrd teńgesi MÁMS paketindegi qyzmetter aqysyn tóleýge jumsalady.

Qalǵan qarajat memlekettik tapsyrys sheńberinde atqarylatyn tegin medıtsınalyq kómek paketindegi qyzmetterge qarastyrylǵan. Bul pakettegi medıtsınalyq qyzmetter statýsyna qaramastan, elimizdiń barlyq azamattaryna tegin kórsetilýi tıis.