Almatylyqtar Qurban aıt merekesin sport sharasymen atap ótti
Ortalyq meshitke kelgen 5000-ǵa jýyq jamaǵat merekelik sharanyń kýágeri ǵana bolmaı, túrli sporttyq jarystarǵa qatysýǵa múmkindik aldy.
Mereke aıasynda «Asyl mura» biregeı baǵdarlamasyn biriktiretin keshendi mádenı-saýyqtyrý jáne sporttyq sharalar barlyq qatysýshylarǵa merekelik kóńil-kúı men esten ketpes kún syılady. Meshitke kelýshi jamaǵattar ulttyq sport túrlerinen baqtaryn synady. Atap ótsek, asyq atý, qoshqar kóterý, arqan tartý jáne armrestlıngten bástesti. Sonymen qatar, aıt-namazdan keıin kórermender «Dombyra» ansambliniń ulttyq aspaptardaǵy týyndylaryn tyńdap, «Top jarǵan» akrobattarynyń ónerin tamashalady.
Sporttyq saıystardyń jeńimpazdary men júldegerleri uıymdastyrýshylar atynan baǵaly syılyqtarmen marapattaldy.
Qoshqar kóterýden top jarǵan Altynbek Qudaıbergenov búgingi kúnnen alǵan əserimen bólisti:
- Men osy syılyqty jeńý úshin tyrysyp baqtym. Allaǵa shúkir, degenime jettim. Qoshqardy 150 ret kóterdim. Árıne, qıyn boldy, biraq, men kún saıyn daıyndalamyn. Ózim kúrespen aınalysamyn. Sonymen birge, búgin gir kóterýden ekinshi oryndy jeńip aldym, - dep uıymdastyrýshylarǵa alǵysyn bildirdi.
Sondaı-aq, qonaqtarǵa taǵamdar men sýsyndar tegin taratyldy. Merekelik shara ortalyq meshittiń naıb-ımamy Jorabaı Dýlatbaevtyń quttyqtaý sózimen óz máresine jetti.
Aıta keter jaıt, Almaty meshitteriniń kelýshileri arasynda buqaralyq sportty damytýǵa baǵyttalǵan "Asyl mura" baǵdarlamasy osy jyly iske qosylyp, meshitke kelýshi jamaǵattar arasynda salaýatty ómir saltyn nasıhattaýda.
Qurban Aıt - musylmandardyń eń mańyzdy merekeleriniń biri, ol Oraza aıaqtalǵannan keıin, 70-shi kúni toılanady. Osy jyly Qurban aıt qyrkúıektiń 1-i kúni bastalyp, úsh kúnge jalǵasady.
