Almatylyqtar quraq kórpe tigýden rekord ornatty
ALMATY. QazAqparat - Almatylyqtar qala kúninde quraq kórpe tigýden rekord ornatty, dep habarlaıdy QazAqparat tilshisi.
QR Tuńǵysh Prezıdenti saıabaǵynda eń uzyn quraq kórpe tigilip, Gınnestiń álemdik rekordtar kitabyna endi.
Ulttyq kórpe saıabaqta 10 900 metr uzyndyqty boılaı tóselgen.
Eske sala ketsek, aýqymdy kórpeni tigý kóktemde Naýryz merekesinde bastalǵan edi. Bul eńbekke qalalyqtar ǵana emes, aýdan tuǵyndary da atsalysqan bolatyn.
Sondaı-aq qala ákimi Baýyrjan Baıbek almatylyqtarǵa óz lebizin bildirdi. Ol jer asty ótkeli jumystary qalalyqtardyń joǵary baǵasyn alǵanyn aıtty. Ár úshinshi aýla abattandyrylyp, 500 kóshe qaıta jóndelgenin, saıabaqtar men skverler jańaryp, jasyl aımaq keńeıtilgenin, jaryqtandyrylǵan 130 tarıhı ǵımarattyń qala túnin nurlandyra túskenin atap ótti.
«Qurmetti almatylyqtar, áli de aıaqtalmaǵan sharýalar bar. Birge bar kúshimiz ben yntamyzdy salyp Almatyny árqaısysymyzdyń armanymyzdaǵy qalaǵa aınaldyra alamyz. Shyn júregimmen qalamyzdyń kórkeıýýine tileýlestigimdi bildiremin»,-dedi Baýyrjan Baıbek.
Qala kúni aıasynda QR Tuńǵysh Prezıdenti saıabaqynda, Panfılov, Jibek joly kóshelerinde, Almaty Arena alańynda, Abaı men eski «Astana» alańynda, Kóktóbe men Ortalyq mádenı jáne demalys saıabaǵynda «Apple Fest» alma festıvali ótip jatyr.
Saltanatty sharada el tarıhyndaǵy alǵashqy elshi áıel Aqmaral Arystanbekovaǵa, halyq ártisi Eskendir Hasanǵalıevke, ǵalym-ádebıettanýshy Serik Qırabavqa «Almaty qalasynyń qurmetti azamaty» ataǵy berildi. Qala kúnin toılaý Almaty Arena-daǵy «B-DAY Party » kontsertimen jalǵasyp, saǵat 21.00 «Astana» alańynda otshashýmen aıaqtalady.
