Almatylyqtar kóshe boıynda shańǵymen syrǵanap júr
ASTANA. QazAqparat - Almaty qalasynyń turǵyndary qalany basqan qalyń qardyń da paıdaly jaqtaryn kórip jatyr. Olar shańǵylary men snoýbordtaryn saılap, kóshede syrǵanap júr. Áleýmettik jelide Almatynyń Fýrmanov kóshesiniń boıynda shańǵymen syrǵanap bara jatqan qala turǵynynyń vıdeosy paıda boldy.
Taǵy bir vıdeony óziniń Facebook paraqshasynda Kanin Snow aty qoldanýshy jarııa etti. Bul kóriniste turǵyndar qar basqan qala kóshelerimen snoýbordpen syrǵanap júr.
Aıta keteıik, Almatyda 16-20 qarasha aralyǵynda 57 sm qar tústi. Osyǵan deıin Almatynyń Tabıǵı resýrstar men tabıǵatty paıdalaný basqarmasynyń basshysy Eldar Keldibaev jaýǵan qardyń ádettegi normadan (15-20 sm) 3 esege asyp túskenin aıtqan bolatyn. Dúısenbi kúni bılik ókilderi joldaǵy qardy tazalap, qalypty jol-kólik qozǵalysyn qamtamasyz etetinin aıtty.
