Almatylyqtar koronavırýstyń bolýy yqtımal jańa tolqynyna qalaı daıyndalyp jatyr
ALMATY.QazAqparat – Almaty ákimi Baqytjan Saǵyntaev qalanyń COVID-19 pandemııasynyń yqtımal jańa tolqynyna daıyndyǵy týraly aıtyp berdi, dep habarlaıdy QazAqparat tilshisi.
Qala ákimi B. Saǵyntaev osymen toǵyzynshy ret «Almaty» arnasyndaǵy Akimat Live baǵdarlamasynyń tikeleı efırine qatysyp, onyń barysynda qalalyqtardyń ózekti suraqtaryna jaýap berdi.
Onyń aıtýynsha, densaýlyq saqtaý júıesiniń tıimdiligin arttyrý boıynsha birqatar pármendi sharalar qabyldandy. Jedel járdem qyzmeti men alǵashqy medıtsınalyq-sanıtarlyq kómektiń jumysyn kúsheıtýge basymdylyq berildi.
Budan bólek, kovıdti aýrýhanalardyń tósek-oryndyq qýaty birtindep artýda. KVI-men kúreste ashylatyn medmekemelerdi eskere otyryp, 7226 oryndy 32 statsıonar daıyndalýda.
Buryn josparlanǵanyndaı, qazan aıynda 1 myń adam qabyldaýǵa qaýqarly jańa medmekemeler ashylady. Mysaly, 500 oryndy RV-90 jańa ınfektsııalyq aýrýhana daıyn. 300 tósek-oryndy ekinshi modýldi ınfektsııalyq gospıtal paıdalanýǵa beriledi. Bulardan ózge, jeke ınvestıtsııalar esebinen 215 oryndy eki tolyqqandy kovıdti klınıkalar qurylatyn bolady.
Baqytjan Saǵyntaev ınfektsııalyq aýrýhanalarda jumys isteıtin kadrlardy daıarlaý týraly da aıtty. Qalada barlyǵy Qoǵamdyq damý basqarmasyna baǵynyshty 74 uıym, 20 respýblıkalyq jáne 93 jekemenshik medıtsınalyq mekemeler bar. Bul uıymdarda nebári 38 myńnan astam qyzmetker jumys isteıdi.
1 tamyzdaǵy jaǵdaı boıynsha COVID-19 emdeýge densaýlyq saqtaý júıesiniń 27 uıymy jumyldyryldy, 6200 tósek-oryn qoıyldy. Sol kezde ınfektsııalyq statsıonarlarda 4035 qyzmetker jumys istedi.
Búgingi kúni epıdemıologııalyq ahýaldyń turaqtanýyna baılanysty kópsalaly klınıkalar ózderiniń ádettegi jumys rejımine kóshti. Koronavırýs ınfektsııasyn emdeıtin ınfektsııalyq klınıkalarda qazirgi kezde 93 naýqas bar, 400-ge jýyq dáriger, medbıke men medıtsınalyq qyzmetker jumys istep jatyr.
Pandemııanyń jańa tolqyny bolǵan jaǵdaıda 5,5 myń medıtsınalyq qyzmetker rezervte tur. Medıtsınalyq joǵary oqý oryndarynyń oqytýshylary, rezıdentteri men ıntern-dárigerler arasynan rezerv quryldy, olardyń sany 450-ge jýyq.
Jańa klınıkalardy kadrlarmen qamtamasyz etý úshin kadr resýrtaryn josparlaý jáne boljaý boıynsha jumystar júrip jatyr, jańadan qosylatyn ınfektsııalyq klınıkalardyń shtattyq kestesi eseptelýde.
Mysaly, arnaıy áleýmettik qyzmet kórsetý ortalyǵynyń bazasynda jańadan ashylǵan 500 tósektik ınfektsııalyq statsıonardyń jumys isteýi úshin shtat kestesine sáıkes 587 shtat birligi qajet, búgingi kúni onyń kadrlarmen jaraqtanýy 70%-dy quraıdy. «Halyq Arena» bazasyndaǵy klınıkada 700-den astam medıtsına qyzmetkeri iriktelip alyndy.
Jańadan ári jedel salynyp jatqan modýldi statsıonarǵa 300 tósek-oryn, 280-ge jýyq medıtsına qyzmetkeri qajet. Búgingi kúni shtattyq keste jasalýda jáne kadrlyq rezerv arasynan mamandar iriktelýde.
Búgingi kúni qalanyń medıtsınalyq uıymdaryna reanımatolog, ınfektsıonıst, epıdemıolog, pýlmonolog sııaqty mamandar jetispeıdi.
Sonymen qatar, qala ákiminiń málimeti boıynsha meduıymdardyń materıaldyq-tehnıkalyq bazalary aıtarlyqtaı kúsheıtildi. Máselen, 52 ÝZI apparaty, 38 rentgen, 269 ÓJJ apparaty, 5 KT, 2 MRT apparaty satyp alyndy. Bularǵa qosa, kópsalaly medıtsınalyq tósekter, 250 tósek janyndaǵy monıtor, zerthanalyq qurylǵylardyń 43 birligi, 1050 ottegi kontsentratory alyndy. Jedel járdem qyzmetiniń avtoparki 35 avtomashınaǵa jańardy, jyl sońyna deıin jedel járdemniń taǵy 100 kóligi alynatyn bolady. Birinshi eshelondaǵy segiz statsıonarǵa medıtsınalyq gazdyń 24 myń tósek-oryndyq ortalyqtandyrylǵan júıesi ornatylýda.
