Almatylyqtar koronavırýsty teatr men kınoteatrlarda juqtyra bastady – Bekshın

ALMATY. QazAqparat – Almatylyqtar koronavırýsty teatrlar men kınoteatrlarda juqtyra bastady. Bul týraly qalalyq Sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın onlaın brıfıng barysynda aıtty, dep habarlaıdy QazAqparat tilshisi.

«KVI jaǵdaılaryn epıdemıologııalyq tekserý barysynda naýqastardyń 40% qoǵamdyq oryndarda, 20% - qoǵamdyq kólikte, sondaı-aq 28% otbasylarynda juqtyrǵany anyqtaldy. Bul azamattar der kezinde aýrýhanaǵa oqshaýlanbaı, týysqandaryn qaýipke tikken. Sońǵy 3 aptada otbasylyq is-sharalar, toı jasaý, as, qudaıy tamaq berý kóbeıgen. Odan bólek qańtarda aýyrǵandar arasynda kınoteatrlar men teatrlarda juqtyrǵandar tirkelip jatyr», - dedi J.Bekshın.

Onyń aıtýynsha, aýrý juqtyrǵandardyń ishinde 20-39 jas aralyǵyndaǵy azamattardyń úlesi – 35%, 40-59 jas aralyǵynda – 27-28%.

Almaty qalasynyń departamenti áleýmettik qashyqtyqty, maska-qolǵap rejımin saqtaý, adamdar kóp jınalatyn jerlerge barmaý qajettigi týraly halyqty eskertý boıynsha júıeli jumys júrgizip otyr.