Almatylyqtar qolynda jeldetkishi bar avtobýs jolaýshysyn talqylap jatyr
ALMATY. QazAqparat - Almatylyqtar qolynda jeldetkishi bar avtobýs jolaýshysyn jelide talqylap jatyr, dep habarlaıdy QazAqparat tilshisi.
Vıdeo áleýmettik jelide paıda boldy. Vıdeo avtory qoǵamdyq kólikte aýa baptaǵysh istemeıtinin aıtty.
«№201 avtobýs, kondıtsıoner óshirýli, ishinde aýa joq, ystyq. Adamdar jeldetkishpen otyr», - delingen jazbada.
Jeli qoldanýshylar beınejazbaǵa qatysty ártúrli pikir qaldyrdy, keıbireýleri ony ázilmen qabyldady, al endi biri ashýlandy.
«Bul jańa avtobýstar, biraq sumdyq. Terezeleri jabyq. Kondıtsıoneri istemeıdi. Dalada kún ystyq, avtobýsta aýa joq. Adamdar tunshyǵyp otyr», - dep jazady jeli qoldanýshylar.
Buǵan deıin, almatylyqtar osy máseleni kóterip, ákimge shaǵymdanǵan bolatyn.
Bul saýalǵa qalalyq mobıldilik basqarmasynyń bastyǵy Ǵanı Myrzahanov jaýap berdi.
Onyń aıtýynsha, búginde 1 198 avtobýsta kondıtsıoner bar, al 1 243-inde joq.
«Búginde 62 avtobýstyń aýa baptaǵyshy isten shyqqan. Qosalqy bólshekterdi Qytaı men Reseıden kútip otyrmyz. Olar 10 kún ishinde kelýi kerek. Sodan keıin kondıtsıonerlerdi qosamyz», - dedi ol «Almaty» telearnasyndaǵy tikeleı efırde.
