Almatylyqtar kólikten shyqpaı-aq 10 mınýtta koronavırýsqa test tapsyra alady
ALMATY. QazAqparat - Almatyda MPK CLINIC Koreıa emhanasy Covid-19-ǵa test tapsyrýǵa bolatyn mobıldi ortalyqty iske qosty, dep habarlaıdy QazAqparat tilshisi.
Mobıldi ortalyq «Nurly taý» bıznes ortalyǵy ǵımaratynda ornalasqan. Bul jerge avtokólikpen kelýge bolady. Bıologııalyq materıal alý kezinde kólikten shyqpaı-aq, tereze arqyly ótýge bolady.
«PTR testin alý protsesi 10 mınýt qana ýaqyt alady. Bul taldaýlardy emhananyń zerthanasyna jiberiledi. Test nátıjesi 6 saǵat ishinde belgili bolady. Qorytyndy klıenttiń elektrondy poshtasyna PDF formatta jiberiledi», - dedi zerthananyń meńgerýshisi Kım De Eng.
Mobıldi ortalyq tańǵy 09.00-den 16:00-ge deıin ashyq. 18 medıtsınalyq qyzmetker 3 aýysymda jumys isteıtin bolady.
Testileýden ótý úshin aldyn ala mpk.kz saıtynda tirkeýden ótý shart.
Tegi, aty-jóni, telefon nómiri, JSN, testileýden ótken ýaqyty men datasy jazylady.
Bir PTR taldaýynyń quny - 15 500 teńge.
«Bul taldaýdyń ereksheligi mobıldi bolǵandyqtan, kólikten túsýdiń qajeti joq. Al bul dezınfektsııaǵa jumsalatyn qarjyny únemdeýge múmkindik beredi. Osy tásil Koreıada vırýstyń keńinen taralýyna kedergi boldy», - deıdi ınstıtýt ókili Kım Lı He.
Onyń aıtýynsha, qazir Ońtústik Koreıada osyndaı 86 mobıldi pýnkt bar. Ol jerden tek júrgizýshiler ǵana emes, jaıaý adamdar da óte alady.
«Osyndaı pýnktterdiń ashylýy jasyryn oshaqtardy anyqtap, der kezinde sanıtarlyq epıdemıologııalyq sharalardy qolǵa alýǵa múmkindik beredi. Al bul bolashaqta epıdemıologııalyq ahýaldy turaqtandyrýǵa septigin tıgizbek», - dedi basqarma basshysy Tileýhan Ábildaev.
Onyń aıtýynsha, qalada qazir 80 myńnan astam adam testileýden ótken.
