Almatylyqtar qoqysty ótkizgeni úshin syılyq alyp jatyr

Qazir qalada qaǵaz, plastık, polıetılen qabyldaıtyn 7 pýnkt arnaıy mobıldi qosymsha arqyly jumys jasaıdy. Qoqys jınaýdyń jańa qosymshasyn jas startaperler - Halyqaralyq ІT ýnıversıtetiniń 4-kýrs stýdentteriniń komandasy oılap tapty. Jańa joba byltyr ınnovatsııalyq jobalar ishinde úzdik startap joba dep tanylǵan bolatyn.

 

«Tazalyq» qosymshasy Android pen Ios platformalaryna júkteledi. Qazir Almatyda 700-ge tarta turǵyn bul qosymshany júktep alǵan.

«Endi qala turǵyndary ótkizgen qoqysy úshin syılyq alady. Máselen, onyń arnaıy tarıfi bar. 10 keli qaǵazǵa 150 teńge beriledi. Ár 1 keli qoqysqa 1 bonýs beriledi. 25 bonýs alǵan tutynýshylar kınoteatrǵa  bılet nemese Medeýge syrǵanaqqa bılet  alady», - dedi joba avtorlarynyń biri Aıbek Rahym.

Onyń aıtýynsha, belsendi azamattarǵa arnaıy profıl ashylyp, mártebe beriledi.

 

Tutynýshylardyń belsendiligi artqan saıyn olardyń qosymshadaǵy mártebesi de ózgeretin bolady.

Beıjaı qaramaıtyn azamattar ekologııa qamqorshysyna aınalady.

«Qazirdiń ózinde bizde 30 shaqty eko-qamqorshy bar. Reıtıngte birinshi Ermek Ahmetov degen turǵyn tur. Ol 1 tonna 500 keli qoqys tapsyrǵan. Qosymshada motıvatsııalyq aqparattar bar. Mysaly 10 keli qaǵaz ótkizse, kishkene shóp ósip turady. Keıin ol shybyqqa, sosyn talǵa aınalady. Sonda adamdar tabıǵatqa qandaı paıdasyn tıgizip jatqanyn anyq kóredi», - dedi Aıbek Rahym.

Sonymen qatar, stýdentter ár ǵımaratqa ýrnalardyń ornynan ekologııalyq boks ornatty. 

 

Ofıs qyzmetkerleri ǵımarattan shyqpaı-aq, plastık pen qaǵaz qoqystaryn arnaıy bokstarǵa salady.

Ázirge mundaı qurylǵylar AlmaU, Halyqaralyq ІT ýnıversıteti men Smart Poınt kovorkıng ortalyǵynda ornalasqan.

Eki aıdan soń paıdalanýǵa smart eko-bokstary beriledi.

«Qazir ǵımarat ıeleri konteınerdegi qoqystardy svalkaǵa alyp ketý úshin ár konteınerge 2000 tg tóleıdi. Eger bizdiń arnaıy smart eko-boksty ornatatyn bolsa, bul olarǵa tıimdi bolar edi. Sebebi qoqys shyǵarý úshin aqsha tólemeıdi. Biz ony ózimiz kelip alyp ketemiz. Smart bokstardyń ishinde arnaıy usaqtaǵysh ustara ornatylady. Túsken qoqysqy maıdalap týrap tastaıdy. Sonda jáshikke 15 emes 35 keli qoqys syıatyn bolady. Ári qalamyz taza, ári qoqys qaıta óńdeýge jiberiledi», - dedi Aıbek Rahym.

Jas novatorlar Almatynyń gúldenýi men tazalyǵyna baǵyttalǵan jobasy úshin ınvestor izdep jatyr.

 

«Másele aqshada emes. Biraq, eger osy joba bıznes qurylymyn qyzyqtyratyn bolsa, ınvestor tapsaq jaqsy bolar edi. Onda búkil qalany osyndaı quraldarmen qamtýǵa bolar edi», - dedi A.Rahym.

 

Sondaı-aq, shara aıasynda 209 aǵash kesilýden saqtalyp, 12 tonnadan asa qoqys qaıta óńdeýge ketti.