Almatylyqtar qoqys úshin eń kóp aqsha tóleıdi - statıstıka
ALMATY. QazAqparat – Ulttyq statıstıka bıýrosy qazan aıy boıynsha Qazaqstanda qoqys shyǵarý qyzmetiniń tarıf qunyn jarııalady, dep habarlaıdy QazAqparat.
Vedomstvonyń málimetinshe, bıyl qazan aıynda Qazaqstan boıynsha qoqys shyǵarý qyzmeti úshin bir adamǵa ortasha tarıf 322 teńgeni qurady.
«Bul qyzmettiń quny óńirler arasynda 94-553 teńge aralyǵynda. Máselen, qoqysty shyǵarý úshin Almaty qalasynyń turǵyndary 553 teńge tóleıdi, tarıf sondaı-aq Semeı qalasynda qymbat – 470 teńge, úshtikti Qostanaı qalasy qorytyndylaıdy – 401 teńge. Qoqysty shyǵarý qyzmeti úshin eń tómengi tarıf Taraz qalasynda tirkelgen - 94 teńge»,- dep habarlady vedomstvonyń baspasóz qyzmetinde. Sondaı-aq Ulttyq statıstıka bıýrosy ótken jyldyń qazan aıymen salystyrǵanda bıyl tarıf 13,6%-ǵa qymbattaǵanyn habarlady.
