Almatylyqtar qoǵamdyq kólikterde aýa baptaǵyshtyń joqtyǵyna shaǵymdandy
ALMATY. QazAqparat - Almatylyqtar qoǵamdyq kólikterde aýa baptaǵyshtyń joqtyǵyna shaǵymdandy, dep habarlaıdy QazAqparat tilshisi.
«Dalada 40- 45 gradýs ystyq. Al qaladaǵy avtobýstarda kondıtsıoner joq. Avtobýstardyń 70-80% -da aýa baptaǵysh joq dep aıta alamyn. Al keıbir avtobýstardyń aralyqtary 20-25 mınýt. Baqytjan Ábdiruly osy máseleni sheshýge kómektesińiz», - dedi turǵyn Almaty telearnasynyń tikeleı efırinde ótken baǵdarlamada.
Bul saýalǵa aldymen qalalyq mobıldilik basqarmasynyń bastyǵy Ǵanı Myrzahanov jaýap berdi.
Onyń aıtýynsha, búginde 1 198 avtobýsta kondıtsıoner bar, al 1 243-inde joq.
«Búginde 62 avtobýstyń aýa baptaǵyshy isten shyqqan. Qosalqy bólshekterdi Qytaı men Reseıden kútip otyrmyz. Olar 10 kún ishinde kelýi kerek. Sodan keıin kondıtsıonerlerdi qosamyz», - dep jaýap berdi ol.
Tikeleı efır kezinde Baqytjan Saǵyntaev qalada taǵy 1 myń avtobýs jetispeıtindigin atap ótti.
«Biz jyl saıyn jańa avtobýstar satyp alamyz jáne olardyń qyzmet etý merzimi bar. Tehnıka bolǵan soń synady. 2012 jyldan bastap biz jolaqyny bir deńgeıde ustadyq - 80 teńge. Biz sýbsıdııa beremiz. Sonyń arqasynda qalada 20 tasymaldaýshymyz bar. Olar qalanyń 50%-yn qamtamasyz etedi, al qalǵan 50% - «Almatyelektrotrans» «, - dedi ákim
Jyl sońyna deıin ákimdik taǵy 300 avtobýs satyp alýdy josparlap otyr.
