Almatylyqtar kóbinese koronavırýsty jumys oryndarynda juqtyrǵan
ALMATY. QazAqparat – Almatydaǵy naýqastardyń basym bóligi koronavırýsty jumys oryndarynda juqtyrǵan. Bul týraly Almaty qalasynyń bas memlekettik sanıtar dárigeri Jandarbek Bekshın onlaın brıfıng barysynda málim etti, dep habarlaıdy QazAqparat tilshisi.
« KVI adamdar kóbine jumys oryndarynda juqtyryp alady. Bul 49,7% quraıdy, al úı jaǵdaıynda juqtyrǵandar – 19,5%, medıtsına uıymdarynda 0,1%»,– deıdi ol.
Onyń aıtýynsha, indet oshaqtary baqylaýǵa alynǵan. Búginde qalada 1400-ge jýyq belsendi oshaq bar.
«Biz indet oshaqtaryn baqylaýda ustap otyramyz. Únemi dezınfektsııalyq jumystar júrgiziledi. Qazir 1400-ge jýyq indet oshaǵy bar. Sonymen qatar, turǵyndarmen túsindirý jumystaryn júrgizemiz»,– deıdi Jandarbek Bekshın.
