Almatylyqtar kóbine qaı jerde KVI juqtyrady
ALMATY. QazAqparat – Almaty sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshın onlaın brıfıng barysynda qaýipti oryndardy atady, dep habarlaıdy QazAqparat tilshisi.
Onyń aıtýynsha, sońǵy 14 kúnde 20-39 jas aralyǵyndaǵy azamattar arasynda juqtyrý kórsetkishi - 35%, 40-59 jas aralyǵyndaǵy adamdardyń úles salmaǵy 33% jetken.
Bul shekteý sharalarynyń buzylýyna jáne korporatıvtik keshterdi ótkizý, saýda obektilerine barýǵa baılanysty bolyp otyr.
«KVI juqtyrý oryndarynyń qurylymynda qoǵamdyq oryndarda (saýda jáne qoǵamdyq tamaqtaný obektileri, bazarlar) juqtyrý qaýpi joǵary. Osy jerlerde juqtyrǵandardyń úlesi 44%. Qalǵan 28 % otbasylarda juqtyrǵan. Sońǵy aptada 2020 jylǵy 25 jeltoqsannan bastalǵan karantındik statsıonarlarda KVI-diń jeńil jáne sımptomsyz túrlerimen aýyratyn naýqastardy oqshaýlaý nátıjesinde otbasyndaǵy baılanystar boıynsha aýyrǵandardyń úles salmaǵy 7,1% - ǵa tómendedi. Osyǵan baılanysty azamattardan osy májbúrli sharaǵa túsinistikpen qaraýdy jáne vırýstyń taralýy toqtaǵanǵa deıin oqshaýlanýdan bas tartpaýdy suraımyz», - dedi Bekshın.
Departament basshysy juqtyrýdy tómendetý úshin vırýstyń taralýyn toqtatý úshin úı - jaılarda da, ashyq aýada da adamdar kóp jınalatyn oryndarǵa barýdan bas tartýdy, maska rejımin, áleýmettik qashyqtyqty qatań saqtaýdy surady.
«KVI naýqastarymen jáne jumys orny boıynsha baılanysta bolǵan adamdar úıde qalyp, tegin negizde tekserýden ótý úshin telefon arqyly ózderiniń emhanasyna habarlasýy kerek. Almaty qalasynyń azamattary men qonaqtaryna JRVI belgileri paıda bolǵan kezde dárigerdi úıine shaqyrtýdy, zeınetkerlerge asa qatty qajet bolmaǵan jaǵdaılarda úılerinen shyqpaýdy usynamyn», - dedi ol.
