Almatylyqtar kıiz úı tigýdi úırendi
ALMATY. QazAqparat - Almatylyqtar kıiz úı qurýdy úırendi. Qolónershiler men ustalar kórmesi Ǵ.Músirepov atyndaǵy Balalar teatrynyń aldynda ótti, dep habarlaıdy Qazaqparat tilshisi.
Mádenı shara «Rýhanı jańǵyrý» baǵdarlamasy aıasynda Almaty qalasy ákimdiginiń, «Almaty qolónershiler palatasy» qoǵamdyq qorynyń qoldaýymen uıymdastyryldy.
Jınalǵandar halyq mýzykasyn, ónerin damytý, nasıhattaý maqsatynda qoıylǵan etno stıldegi kontsertti tamashalady.
Qala turǵyndary men sheteldik qonaqtar úshin qazaq halqynyń turmysy men tirshiliginiń sımvoly ispetti kıiz úı qoıyldy.
Kórme kórermenderi úshin kıiz toqý óneri boıynsha sheberlik klasy ótti.
Jármeńkege kelgen árbir qonaq kıiz úımen jiti tanysyp, estelik retinde sýretke túsip, «Yurtart» qazaq kıiz úılerin jáne ulttyq kórkemóner kásibı zattaryn jasaý tehnologııasymen tanysty.
"Bul jármeńke jylyna 10 ret uıymdastyrylady. Naýryzdaǵy jármeńkeniń ereksheligi - ulttyq qolóner buıymdaryn jasaý tehnologııasy tanystyryldy. Búgin bizge Qazaqstannyń túkpir-túkpirinen, Reseıden, Qyrǵyz elinen 80-nen asa qolónershi sheberler keldi. Kórme rýhanı muramyzdy, mádenıetimizdi, dástúrimiz ben ádet-ǵuryptarymyzdy saqtap qalý, Qazaqstanda qolónerdi damytý jáne jastardyń arasynda dáripteý, ulttyq kásipti jandandyrý jáne damytý, qolónershilerdi qoldaý maqsatynda ótkizilip jatyr. Osy is-sharany ótkizý barysynda qolónershiler men tutynýshylar arasynda tikeleı baılanys ornaıdy", - dedi uıymdastyrýshylardyń biri Dámeli Janasheva.
Jármeńkede merekelik dastarhanǵa arnalǵan keramıkadan jáne aǵashtan jasalǵan ydystar, kúmisten jasalǵan áshekeıler, qoldan jasalǵan sómkeler men oıynshyqtar, Qazaqstandyq agat pen tabıǵı tastardan jasalǵan áshekeıler, kórkem penjekter men halattar, kıizden ılengen kıimder, qoldan jasalǵan kilemder qoıyldy.
Qolóner merekesi erteń de jalǵasyn tappaq.
