Almatylyqtar «Keńsaı» zıratyn keńeıtýge qarsy shyqty
ALMATY. QazAqparat - Almatylyqtar qalanyń ásem jerlerine zırat salynýyna narazylyǵyn bildirdi, dep habarlaıdy QazAqparat tilshisi.
Jelige vıdeo júktegen qala turǵyny «Keńsaı» zıratynyń aýmaǵy keńeıtilip jatqanyn jáne aýmaqtyń bir bóligi qorshaýmen qorshalǵanyn aıtty.
Ol sondaı-aq zırat salynatyn tóbelerde Qyzyl kitaptaǵy ósimdikter ósetinin atap ótti.
Mán-jaıdy anyqtaý úshin QazAqparat tilshisi Almaty qalasy ákimdigine resmı saýal joldaǵan edi.
Ákimdiktiń bergen jaýabyna sáıkes, Almaty qalasy ákiminiń 2014 jylǵy 15 qazandaǵy №4/805-4519 qaýlysyna sáıkes, «Dýman» yqsham aýdanynyń ońtústigi, «Keńsaı» zıratynyń shyǵysy mekenjaıynda aralas úlgidegi zıratty uıymdastyrý úshin aýdany 92,08 ga ýchaske bólingen.
Búgingi tańda zırat ınfraqurylymynyń qurylysy tolyq aıaqtaldy (kireberis joldar, ákimshilik ǵımarat, qorshaý), qurylys jumystary 2018 jyly júrgizilgen.
«Jobaǵa sáıkes, ýchaskeniń jalpy aýmaǵynan 28-32 ga marqumdardy jerleýge arnalǵan, al qalǵan 60 ga jasyl jelekterge arnalǵan zırattyń sanıtarlyq aımaǵy bolyp tabylady», - delinedi ákimdiktiń bergen jaýabynda.
