Almatylyqtar Qazposhta bólimshelerindegi kezekke shaǵymdandy
ALMATY. QazAqparat - Almatylyqtar Qazposhta bólimshelerindegi kezekke shaǵymdandy, dep habarlaıdy QazAqparat tilshisi.
Almatylyqtar QazAqparat redaktsııasyna «Qazposhta» bólimshelerindegi úlken kezekke shaǵymdandy.
Solardyń biri «Nýrkent» shaǵyn aýdanynyń turǵyny Jazıra Ydyrysova.
«Men poshta qyzmetin jıi qoldanatyn tutynýshylarynyń birimin. Eki aptada bir ret Nur-Sultan qalasyna qujat jiberýim kerek. Qashan kelsem de uzyn- sonar kezek. Ásirese, túski saǵat 11-den keıin hat pen sálemdeme jóneltý múmkin emes. Maǵan Alataý aýdanyna qarasty «Nurkent» shaǵyn aýdanyndaǵy № 38 poshta bólimshesi jaqyn. Sondyqtan osynda kelemin. Bir ǵana tereze jumys isteıdi. Mamandar fızıkalyq turǵyda qyzmet kórsetip úlgermeıdi», - dep shaǵymdandy almatylyq Jazıra Ydyrysova.
«Qazposhta» AQ baspasóz qyzmeti máselege qatysty túsinikteme berdi.
«Alataý aýdanyndaǵy № 38 bólimshede ádette kezek bolmaıdy. Qazirgi tańda operatordyń eki orny bos tur. Zalda 4 adam jumys isteıdi. Jalpy Almatyda fılıaldarda bos jumys oryndary bar. Onyń ústine kóptegen qyzmetkerler densaýlyǵyna baılanysty demalysqa shyqty»,- dep habarlady Qazposhtanyń baspasóz qyzmeti.
Vedomstvo málimetinshe, qazir operatorlar, poshtashylar, kýrerler men ınkassatorlar úshin bos jumys oryndary bar.
Aıta keteıik, Almatyda «Qazposhta» AQ-nyń 67 bólimshesi bar, onda 670 qyzmetker jumys isteıdi.
«Bıylǵy jyldyń 1 aqpannan bastap «Qazposhta» AQ qyzmetkerleriniń jalaqysy 93,5%-ǵa ósti. Kompanııa poshtashylardyń, operatorlardyń, júrgizýshilerdiń, ekspedıtorlardyń jáne basqa da óndiristik qyzmetkerlerdiń jalaqysyn ındeksatsııalady»,- dep atap ótti Qazposhta baspasóz qyzmeti.
