Almatylyqtar Qazan festıvaliniń bas júldesin alǵan fılmdi tamashalady

Atalǵan fılm Qazanda ótken musylman fılmderi Halyqaralyq kınofestıvaliniń bas júldesin utyp alǵan bolatyn.

Rejısserdiń jańa jumysy munyń aldyndaǵylary sııaqty jolyn festıvaldardan bastady.

Fılm Kann kınofestıvaliniń «Erekshe kózqaras» atalymyna qatysty. Qazandaǵy musylman fılmderi festıvalinde úzdik tolyqmetrajdy fılm degen atalymda bas júldeni utyp aldy. Al bas keıipker Qýandyq Dúısenbaev úzdik er adam rólin somdaǵan akter retinde tanyldy.

Búgingi premerada Almatydaǵy kınozalda ıne shanshar jer bolmady.

Uıymdastyrýshylar kire almaı qalǵan adamdarǵa 19-qyrkúıekte kórsetýge ýáde berdi. Sonymen qatar, qazir atalǵan fılmdi 8-22 qyrkúıek aralyǵynda keń prokatqa shyǵarý týraly kelissózder júrgizilip jatyr.

Týyndynyń sıýjeti boıynsha Saltanat (Dınara Baqtybaeva) shalǵaıdaǵy aýylda ata-anasymen turady.

Baýyrlary qalada turady. Qyzdyń ákesi elge qaryz bolyp, ózine qol salady. Endi qaryzdyń taýqymeti anasynyń moınyna túsedi. Ekeýi qalaǵa kóshýge bel býady. Saltanatpen birge oǵan ǵashyq jigit Qýandyq ta jolǵa shyǵady.

Qalada jastar aqsha tabýdyń jolynda birqatar qıyndyqtarǵa kezdesedi. Kınoda eki jastyń arasyndaǵy mahabbat kórinis tapqan.

«Bul fılm ónerde de, ómirde de úlken mańyzǵa ıe ıman men mahabbat týraly syr shertedi. Men osy joly qarańǵylyq qursaýynan shyǵyp, jaqsy fılm túsirýdi jón kórdim. Reseılik operator Aıdar Sháripov meniń jumysymdy tegin túsirip berdi. «Laskovoe bezrazlıchıe mıra» bizdiń folklorǵa negizdelgen. Qozy men Baıannyń mahabbaty kórsetilgen. Biz dala ańyzynyń qaladaǵy úlgisin kórsetýge tyrystyq», - dedi Ádilhan Erjanov.

Kınodaǵy mýzykany Qurmanǵazy atyndaǵy ulttyq konservatorııanyń túlegi Nurasyl Nurıddın jazdy.

Kınosynshy Oleg Boretskıı Ádiljannyń jańa jumysyn burynǵydan qaraǵanda «eresek» dep baǵalady.

«Ádilhan ekzotıkadan etıkaǵa bet burdy. Biz búgin eń keremet kıno kórdik», - dedi Oleg Boretskıı.

Aıta ketý kerek, atalǵan fılm Frantsııada ekinshi apta prokatta kórsetilip jatyr.