Almatylyqtar Qazaqstan halqynyń birligi kúni merekesin atap ótip jatyr
ALMATY. QazAqparat - Merekelik serýen Respýblıka Saraıy aldynda jáne qaıta jańarǵan Panfılov pen Jibek joly kósheleri boıynda ótýde. Munda qala turǵyndary men qonaqtary úshin qazaq estradasynyń juldyzdary men megapolıstiń etnomádenı birlestikteri ujymdarynyń qatysýymen mazmundy mýzykalyq baǵdarlama daıyndalǵan, dep habarlaıdy QazAqparat tilshisi Almaty qalasy ákimdigi baspasóz qyzmetine silteme jasaı otyryp.
Almaty ákimi Baýyrjan Baıbek óziniń quttyqtaý sózinde Memleket basshysynyń syndarly saıasaty arqasynda álemde moıyndalǵan beıbitshilik pen kelisimniń modeli jasalǵanyn,onyń negizgi konsolıdatsııasy azamattyq qaǵıda ekenin atap ótti. Kezinde Elbasynyń bastamasy boıynsha qurylǵan Qazaqstan halqy Assambleıasy «beıbitshilik pen kelisimniń shynaıy shyraǵyna» aınaldy.
«Qazaqstan halqynyń birligi kúni Uly dalanyń kóp ǵasyrlyq dástúrli rýhy - ashyqtyqty, meıirimdi, toleranttylyqty, qonaqjaılylyqty pash etedi. Osynaý dástúrler ǵasyrlar boıyna bizdiń megapolıstiń qaıtalanbas rýhyn qalyptastyrdy, aıryqsha sıpatqa bóledi. Mine, myń jyldan beri Almaty túrli mádenıettiń, dinniń, tildiń ózara úndesken qasıetti mekenine aınaldy. Sondyqtan Almatyny myń boıaýly qala dep tekke aıtpasa kerek. Túrli ult pen din ókilderinen quralǵan almatylyqtar búgingi kúni birge ómir súrýde, eńbek etýde jáne ár merekeni birge atap ótýde. Biz osynaý baǵa jetpes baılyqty saqtaýǵa jáne odan ári damytýǵa tıispiz», - dedi Baýyrjan Baıbek.
Ol tek ashyq, meıirimdi ári baýyrmal qala ǵana ınvestıtsııa, ınnovatsııa men adamı kapıtal úshin básekelestik ornyqqan zamanaýı jahandyq álemde tabysqa jetetinin atap ótti.
«Qala keńistigine zamanaýı standarttardy engize otyryp, biz Almatyny álemniń úzdik megapolısi, damyǵan týrıstik ortalyǵyna anıaldyratyn bolamyz. Ózgergen orta adamdardy da jańǵyrtyp, olardyń dúnıetanymyn ashyq jáne meıirimdi etedi. Bul týraly Prezıdent «Rýhanı Jańǵyrý» baǵdarlamasynda aıtty. Bizdiń qalanyń áleýeti óte zor, degenmen Almatynyń basty baılyǵy - qala turǵyndary, olar ártúrli bolǵanymen rýhy jaǵynan ózara jaqyn», - dedi megapolıs basshysy.
Qazaqstan halqynyń birligi kúni aıasynda merekelik baǵdarlamaǵa 500-den astam ánshiler qatysýda. Olardyń ishinde Roza Rymbaeva, Dıana Sharapova, Álı Oqapov, Roman Kım, Luina, ıAnıs Kaısıdı, Ádiljan Omarov, «Saryn» dýeti, «Dervıshı», «MýzArt», «Assyl», «Vox Acapella» toptary, «Vivat», «Rise», «Ivory» shoý- baletteriniń ókilderi jáne kóptegen basqalary bar.
Panfılov jáne Jibek joly kósheleriniń boıyndaǵy shaǵyn sahnalarda túrli kontsertter ótýde jáne megapolıstiń etnomádenı ókilderi birlestikteriniń ózindik mádenıeti men dástúrleri tanystyrylýda.
Saǵat 19:30-da Aıqyn Tólepbergen «15 jyl, Sizdermen birge» atty óziniń jeke kontsertin usynady, al 21:30- da sahnaǵa «Án merekesi» baǵdarlamasymen «Týretskıı horynyń» artısteri shyǵady. Mereke qurmetine ujymmen birge áıelderdiń «SOPRANO Týretskogo» arttoby án shyrqaıdy, osylaısha talant pen sulýlyq úılesim tabady.
