Almatylyqtar Qazaq ulttyq kıimderiniń merekesin atap ótýde
Almatynyń Arbaty alýan túrli tústerge kómkerildi. Ol sáýirdiń sońǵy demalys kúnderi qazaqtyń salt-dástúrine qanyqqan ortalyq kóshege aınaldy. Munda «Almaty qolóner palatasy» qoǵamdyq qory ókilderiniń jármeńkesi ornalasqan. Al kósheniń qaq ortasynda kıiz úıler boı kótergen. Sharanyń eń áserli bóligi - Ulttyq kıimder merekesi.
Ártister jurtshylyqqa qazaqtyń ádet-ǵurpyn kórsetýde, al qolónershiler kıizden jasalǵan buıymdardy, mýzykalyq aspaptardy, kesteler men oıynshyqtar usynýda.
«Qazaqtyń ulttyq kıimi, dástúri búginde álemge áıgili brendke aınalýda. Kóshpendi ata-babamyzdyń kıimi álemdik sán úlgisine aıtarlyqtaı yqpal etkenine qaramastan, ókinishke qaraı, biz óz kıimderimiz týraly eshteńe bilmeımiz. Negizinen, shapandardyń ózinde oıýlardyń túrli keskini bolǵan. Biraq biz solardyń birine ǵana - 30-ynshy jyldardan keıin joǵarydan túsken buıryq boıynsha taralǵan iri altyn tústes oıýǵa úırengenbiz. Qazir arhıvter men mýzeılerdiń kómegimen ulttyq kıim-keshektiń jańa derekterin ashý ústindemiz», - deıdi tarıhshy, jazýshy, Uly Dala murasyn nasıhattaýshy Arman Nurmuhambetov.
«Qazaq ulttyq kıimderiniń merekesi alǵashqy jyldan-aq halyqaralyq sıpatqa ıe boldy. Bul kúni otandastarymyzdy dástúrli qazaq kıimin kıip júrýge shaqyramyz. Belgııa, AQSh, Qytaıdaǵy otandastarymyz ulttyq kıimdi maqtanyshpen kıip júrdi. Osy kúni Oralda «Qazaqtelekomnyń» qyzmetkerleri, basshylyqty qosa alǵanda túgel ulttyq kıimde jumys istedi», - dep atap ótti ol.
Ne degenmen, bastama avtorlary ótkenmen ómir súrýge shaqyrmaıdy.
«Bilesizder me, ýaqyt bir ornynda turmaıdy jáne ulttyq ornamentterdi kúndelikti kıimniń dızaınyna engizý bolady», - deıdi Arman Nurmuhambetov.
