Almatylyqtar «Qaırat» fýtbol komandasynyń ańyz oıynshysymen qoshtasty
ALMATY. QazAqparat - Almatylyqtar Ortalyq stadıonda aty ańyzǵa aınalǵan qazaq fýtbolshysy Tımýr Segizbaevpen qoshtasty, dep habarlaıdy QazAqparat tilshisi «Qaırat» FK baspasóz qyzmetine silteme jasaı otyryp.
Qaraly jıynda Almaty qalasy dene shynyqtyrý jáne sport basqarmasynyń basshysy Ábil Dońbaev marqumnyń otbasy men aǵaıyn-týystaryna kóńil aıtty. Sonymen qatar, Qazaqstan fýtbol federatsııasynyń prezıdenti Seıilda Baıshaqov pen Kásibı fýtbol lıgasynyń prezıdenti Azamat Aıthojın qaraly jıyn aldynda marqumnyń ótken ómiri týraly baıandap, jyly lebizderin bildirdi.
«Tımýr Sezigbaevty jıylǵan jurt ystyq yqylas, qımas sezimmen shyǵaryp saldy. Marqumnyń Qazaqstan fýtbolyna qosqan ólsheýsiz eńbegi eske alynyp, alǵys bildirdi. Adamnyń bul ómirdegi baǵasyn dostarynyń qurmetine qarap bilýge bolady. Marqumdy shyǵaryp salýǵa jınalǵan onyń dostarynyń qarasy kóp boldy», - deıdi «Qaırat» FK-baspasóz qyzmetindegiler.
