Almatylyqtar qalany jaqsartý maqsatyndaǵy óz ıdeıalaryn júzege asyra alady - ákimdik
ALMATY. QazAqparat – Almatyda «Bıýdjetke qatysý» jobasyna ótinimderdi qabyldaý 5 qazanda aıaqtalady, dep habarlaıdy QazAqparat tilshisi.
Almaty qalasynyń ákimdigi turǵyndarǵa «Bıýdjetke qatysý» jobasyna ótinimderdi qabyldaý 5 qazanda aıaqtalatynyn eskertedi. Ótinimdi budget.open-almaty.kz. saıtynda qaldyrýǵa bolady.
Árbir adam qaladaǵy ortany damytý boıynsha óz ıdeıasyn usyna alady. Eger bastamany basqa turǵyndar daýys berý barysynda qoldasa, ol qalalyq bıýdjet esebinen júzege asyrylady. Bir ótinim 55,5 mln teńgeden aspaýy tıis. Qarjylandyrýdyń jalpy kólemi 6,4 mlrd teńgeni quraıdy — qalanyń árbir aýdanyna 800 mln teńgeden keledi.
«Bizdiń qalamyzdyń kez kelgen turǵyny óz aýlasyn, kóshesin nemese gúlzaryn abattandyrý boıynsha ótinim bere alady jáne basty shart joba 55,5 mln.teńgeden aspaýy tıis. Mindetti túrde qala aýmaǵynda bolýy tıis. Kez kelgen foto nemese sýretti qosa berý kerek. Osy abattandyrýdy kórip otyrsyzdar, eger sizdiń jobańyzǵa barynsha kóp daýys berilse, joba qala bıýdjeti esebinen iske asyrýǵa jiberiledi», - dedi Almaty qalasy Strategııa jáne bıýdjet basqarmasynyń basshysy Almas Batanov.
Portalda ótinimderdi qabyldaý, daýys berý jáne bastamalardy irikteý onlaın rejıminde budget.open-almaty.kz ótedi.
Jobalardy irikteý krıterııleri:
– aýmaqty kógaldandyrý;
–trotýarlardy jaılastyrý;
– trotýarlar, pandýstar, aryqtar salý jáne jóndeý;
– jalpyǵa ortaq paıdalanylatyn oryndardy (saıabaqtar, skverler, jaıaý júrginshiler aımaqtary jáne ózge de obektiler) qurý, jóndeý jáne jaryqtandyrý);
– jıekterdi, tireý qabyrǵalaryn jóndeý;
– polıgondardy joıý;
– aýla aýmaqtarynda jáne jalpy paıdalaný oryndarynda sporttyq (jattyǵý alańdaryn, fýtbol, basketbol, voleıbol alańdaryn), balalar oıyn alańdaryn ornatý, jóndeý jáne jaryqtandyrý.
Esterińizge sala keteıik, «Bıýdjetke qatysý» jobasy Almatyda 2019 jyldyń tamyz aıynda iske qosyldy.
Osy jyldyń qorytyndysy boıynsha 1,4 mlrd teńgege 55 joba iske asyrylýda. Birqatar jobalar aıaqtalyp, paıdalanýǵa berildi. Osy tetiktiń arqasynda qala turǵyndary qalada skeıtpark salyp, sóıleıtin oryndyq ornatty. Balalar men eresekterdiń sportpen shuǵyldanýyna arnalǵan alańdar, skverler men qala turǵyndarynyń demalys oryndary jabdyqtaldy.
