Almatylyqtar qala ortalyǵynda salynatyn qurylysqa shaǵymdandy
ALMATY. QazAqparat - Almatylyqtar qala ortalyǵydaǵy qurylysqa shaǵymdandy, dep habarlaıdy QazAqparat tilshisi.
Nurmaqov kóshesinde ornalasqan № 81 úıdiń turǵyndary qala bıliginen aýladaǵy qurylysty toqtatýdy surady.
Almaty qalalyq josparlaý jáne ýrbanıstıka basqarmasynyń baspasóz qyzmetiniń málimetishe, qalanyń bas damý josparyna sáıkes, Jambyl, Áıtıev, Qabanbaı batyr, Nurmaqov kóshelerindegi úılerdiń aýlasynda jańa eki ǵımarat salynyp jatyr.
Birinshi nysan- kópqabatty turǵyn úı.
«Bul jerde kópfýnktsıonaldy turǵyn úı kesheni paıda bolady. Qurylystyń eskızdik jobasy 2007 jyly maquldanǵan bolatyn. Alaıda menshik ıesiniń aýysýyna baılanysty qosymsha ruqsat 2020 jyly berildi. Burynǵy ınvestordyń qarjysy jetpegendikten qurylys toqtap qalǵan. Osy úıge aqsha salǵan almatylyqtardyń baspanasyz qalýy múmkin edi. Der kezinde ınvestor tabylyp, másele sheshildi», - dep habarlady basqarmadaǵylar.
Ekinshi nysan - jerasty parkıngi bar 12 qabatty qonaq úı kesheni bolmaq.
«Jobalaýǵa arnalǵan sáýlet-josparlaý tapsyrmasy 2014 jyly berildi. Al eskızdik jobasy 2016 jyly maquldandy. 2018 jyly nysan Qala qurylysy keńesi men memlekettik saraptamadan ótti. Qurylys Qazaqstan aýmaǵynda qoldanylatyn qurylys normalary men erejelerine sáıkes keledi», - deıdi basqarma.
Almaty qalalyq josparlaý jáne ýrbanıstıka basqarmasy atap ótkendeı, eki nysannan basqa, atalǵan aýmaqta eshqandaı ǵımarat salynbaıdy. ıAǵnı, úshinshi ýchaskeniń ıesine qurylys júrgizýge ruqsat berilgen joq.
