Almatylyqtar qala kúnin qalaı atap ótti
Sondaı-aq Almatynyń barlyq segiz aýdanda kontsertter, kórmeler, fleshmobtar, festıvaldar uıymdastyryldy. Merekeniń ajaryn Tuńǵysh Prezıdent saıabaǵynda ótken «Alma Fest» festıvali asha tústi. «QazAqparat» fototilshisi eń jarqyn sátterdi sýretke túsirip qaıtty.
Tuńǵysh Prezıdent saıabaǵy alyp alma baqqa aınalady. Alma jármeńkesinde Talǵar, Qarasaı, Eńbekshiqazaq jáne Uıǵyr aýdandarynan shamamen 45 baý-baqsha seriktestigi 125 tonna jemis ákeldi. Munda almanyń 13 túri kópshilikke usynyldy. Atap aıtsaq, amerıkanka, kandıl, Aınur, Saltanat, Rashıda jáne gala men aport sekildi sorttary bar. Merekeniń ár qonaǵy ózine unaǵan almanyń dámin tatyp kórdi.
Festıvalde qala turǵyndary men qonaqtary jemis-jıdek jep qana qoımaı, sándik-qoldanbaly óner sheberleriniń shyǵarmashylyq jumystarymen tanysyp, ustap kórý múmkindigine ıe boldy.
Sondaı-aq is-shara kezinde sýretke túsýge arnalǵan túrli oryndar uıymdastyrylyp, kontsert qoıyldy. Qazaqtyń ulttyq oıyndary oınatyldy. Eresekter qol kúrestirip, kúsh synasty. Oqýshylar boz kilemde myqtyny anyqtady. Al balalar bolsa, toǵyzqumalaqtan jarysty.
Bir mezgilde megapolıstiń 8 birdeı aýdanynda jáne Panfılov pen Jibek joly kóshecinde «Týǵan kúnińmen, Almatym!» atty festıval ótti. Bul – ótken ǵasyrdyń 1980-90 jyldaryndaǵy mádenıetti eske salatyn is-shara boldy. Mereke aıasynda shahar turǵyndary eski Almatynyń ánderin tyńdap, ashyq aspan astynda fılm kórýge múmkindik aldy. Budan bólek, qolóner jármeńkesi, zamanaýı óner kórmesi, jergilikti sýretshiler men dızaınerlerdiń sheberlik synyptary ótti.
Abaı alańynda qala ákimi Erbolat Dosaev almatylyqtardy quttyqtady.
«Almaty – Qazaqstan táýelsizdiginiń «Altyn besigi», elimizdiń jańa tarıhy bastalǵan qala dep atalady. Bizdiń qalamyzdyń basty qundylyǵy – sizder, Almaty turǵyndary. Sizder qalany kórkeıtip, alýan túrli jáne qonaqjaı etesiz. Osy erekshe kúni megapolıstiń damýyna úlesin qosqan ár almatylyqqa alǵys bildiremin», - dedi Erbolat Dosaev.
Mereke barysynda álemdegi eń úlken rýbık teksheleriniń mozaıkasy ornatyldy. Mozaıka 5040 teksheden jınaldy, osylaısha Gınnestiń rekordtar kitabyna endi.
Álemdik rekord resmı túrde rekordtar kitabynyń ókili jáne Almaty ákimi Erbolat Dosaevtyń qatysýymen tirkeldi.
Buryn tekshesinen mozaıka jınaý rekordy Reseıge tıesili edi. Kórshi elde ol 2020 jyly ornatylǵan. Onda 4800 Rýbık teksheleri qoldanyldy.
Mozaıkanyń avtory Qýanysh Kerimqulov pen Jeńis Aıtjanov. Illıýzıonıst Jeńis Aıtjanov Gınnestiń rekordtar kitabyna besinshi ret engen. Ol ótken 4 rekordty jyldamdyq trıýkterin oryndaý arqyly jańartty.
Astana alańynda «Saǵyndym Almatymdy», Abaı alańynda «Almaty juldyzdary» mýzykalyq festıvali ótti.
Qala kúninde uıymdastyrylǵan keshtiń basym bóligi alyp shahardyń tarıhyn zerdeleýge baǵyttaldy.
