Almatylyqtar qala kóshelerin jóndeýge úles qosa alady

ALMATY. QazAqparat - Qala turǵyndary 2019 jyly jóndeýdi qajet etetin kóshelerdi atap, usynys bere alady, dep habarlaıdy QazAqparat tilshisi Almaty ákimdiginiń resmı ókili Tımýr Bazarbaevqa silteme jasap.

Ótinishter bıylǵy qyrkúıek aıyna deıin qabyldanady. Jóndeý boıynsha usynystardy [e-mail] arnaıy saıtyna «Jolǵa jóndeý jumystary qajet» nemese «Trotýar kerek» belgisimen jiberýge bolady.

Almatyda sońǵy úsh jyl ishinde jalpy uzyndyǵy 500 shaqyrymdy quraıtyn 524 kóshe jóndeýden ótti.

Bıyl qala boıynsha ortasha deńgeıdegi jóndeý jumystary jalpy uzyndyǵy 155 shaqyrymdy quraıtyn 157 kóshede júrgizildi.

«Kóshe-jol jelilerinde ortasha jóndeý jumystaryn júrgizý kezinde merdigerlerge 3 jyl beriletinin aıta ketý kerek. Osy ýaqyt aralyǵynda uıym óz qarajatyna kez kelgen aqaýlar men kemshilikterdi qaıta qalpyna keltirýi tıis. Almaty qalasy ákiminiń tapsyrmasymen trotýarlar men aryqtardy jóndeýge kóp kóńil bólindi», - dedi Tımýr Bazarbaev.

Sondaı-aq, jańa úsh kólik aıyryqtaryn salý, birneshe kóshelerdi qaıta qurý jáne avtobýstyq dálizderdi jasaý boıynsha jumystar atqarylýda. Budan bólek, kópirler keńeıtilip jatyr.

Jolaýshylar kóligi men avtomobıl joldary basqarmasy 123 kóshedegi jol-kólik jumystaryn aıaqtady. 25 tamyzǵa deıin qalanyń qalǵan 34 kóshesindegi ortasha jóndeý jumystary aıaqtalady.

Sondaı-aq, Tımýr Bazarbaev Energetıka jáne kommýnaldyq sharýashylyq basqarmasy 800 shaqyrymdaı ınjenerlik jelilerdi qaıta jóndegenin jáne salǵanyn málim etti.

Jolaýshylar kóligi jáne avtomobıl joldary basqarmasy 2016 jyly ortasha jóndeý aıasynda 196 kóshedegi 140 shaqyrym jol jabynyn jańartty. Qazirgi tańda barlyq magıstraldyq kóshelerde jáne jergilikti joldardyń 80%-ynda jóndeý jumystary júrip jatyr. Jaıaý júrginshiler úshin uzyndyǵy 30,5 shaqyrym trotýar jasaldy.