Almatylyqtar gaz tartý úshin paıyzsyz nesıe ala alady – ákimdik

ALMATY. QazAqparat – Almatylyqtar óz úılerine gaz tartý úshin paıyzsyz nesıe ala alady. Bul týraly onlaın brıfıng barysynda qalalyq Energotıimdilik jáne ınfraqurylymdyq damý basqarmasynyń basshysy Áset Masabaev málim etti, dep habarlaıdy QazAqparat t ilshisi.

Áset Masabaev qala turǵyndaryn paıyzsyz nesıe alý arqyly tabıǵı gazǵa qosylýǵa shaqyrdy.

«Almatylyqtar kepilsiz, paıyzsyz 300 myń teńgege deıin nesıe alyp, 18 aı ishinde alǵan somasyn qaıtara alady. Qalada tabıǵı gazǵa qosylýdyń ortasha baǵasy 148 myń teńgeni quraıdy. Oǵan jobalaý, esepteý quraly, magıstraldy gaz qubyrynan úıge deıin jetkizý kiredi. Osy másele boıynsha keńes alý úshin turǵyndar aýdandyq ákimdikterge júginýi qajet»,– dedi basqarma basshysy.

Sonymen qatar, ol qajetti qujattardy atady.

«Qajetti qujattar paketine: jeke kýálik, jer telimine memlekettik akti, úıge tehnıkalyq pasport kiredi. Turǵyndar belsendi atsalysyp jatqan joq. Turǵyndar Halyq bankine (paıyzsyz nesıe alý úshin) habarlasýy kerek. Eger múmkindik bolsa, gazdy ózimiz de júrgize alamyz», – dedi ol.

Onyń aıtýynsha, ár turǵyn qaı qazandyqty, qandaı kólemde qoıý kerektigin ózi sheshedi. Gaz qazandyǵyn ornatý kezinde qaýipsizdik erejelerin eskerý qajet.

Eske salaıyq, Almaty qalasynyń ákimi B.Saǵyntaev, halyqtyń áleýmettik osal toptaryn tabıǵı gazǵa tegin qosý boıynsha, sondaı-aq Halyq bankten 300 myń teńgege deıingi somaǵa paıyzsyz nesıe alý arqyly qoldaý kórsetýge bastama jasaǵan bolatyn.