Almatylyqtar «Ǵarysh kóshpendisi» fılmin tamashalady
ALMATY. 17 sáýir. QazAqparat - Búgin Almatydaǵy Ál-Farabı atyndaǵy QazUÝ-dyń mehanıka-matematıka fakýltetinde Talǵat Musabaevtyń ómir joly týraly «Ǵarysh kóshpendisi» derekti fılmi kórsetildi.
Fılm avtory Ulttyq ǵarysh agenttiginiń baspasóz hatshysy, «Qazaqstan ǵarysh sapary» ulttyq kompanııasy prezıdentiniń keńesshisi, «Baıqońyr» ǵarysh aılaǵyndaǵy «QazAqparat» aqparat agenttiginiń arnaýly tilshisi Sara Nurǵalıeva.
Sara Qabıqyzy bul fılmdi 33 jyl boıy ǵarysh salasynda jınaǵan materıaldary boıynsha túsirgen. Maqsat - esimi álemge áıgili otandasy týraly qazaqstandyqtardyń maǵlumatyn keńeıtý. Qazaqstannyń Halyq Qaharmany, Reseı batyry, tehnıka ǵylymdarynyń doktory. T. Musabaev 1951 jyly 7 qańtarda Almaty oblysynyń Jambyl aýdanyna qarasty Qarǵaly aýylynda dúnıege kelgen. Ǵaryshqa ózimen birge qasıetti Quran kitabyn jáne Qazaq eliniń kók baıraǵy men Baıqońyrdyń bir ýys topyraǵyn alyp ushqan ol onda 1 jyldaı bolyp keldi. Fılmde ǵaryshker «meniń ǵaryshqa ushýyma tikeleı septigin tıgizgen birden-bir tulǵa ol - Prezıdentimiz Nursultan Nazarbaev. Maǵan Otanym bárin berdi, men endi Otanymnan alǵandy qaıtarýym kerek», - degendi aıtady.
