Almatylyqtar fıskaldy chek bermegen 1200-den astam dúken ıesiniń ústinen aryzdandy

ALMATY. QazAqparat – Almatyda ótken jyly taýarlardy satý nemese qyzmet kórsetý kezinde fıskaldy chek bermegen kásipkerlerge qatysty salyq organdaryna 3 myńnan astam, bıylǵy úsh aıda 1200-den astam aryz túsken. Bul týraly Almaty qalasy boıynsha Memlekettik kirister departamentiniń baspasóz qyzmetinen málim etti, dep habarlaıdy QazAqparat tilshisi.

Vedomstvo aqparatyna sáıkes, azamattar fıskaldy chektiń berilmeý sebebinen aqaýy bar nemese merzimi ótken taýardy qaıtarý, aıyrbastaý múmkindigi joq ekenin aıtyp shaǵymdanǵan.

«QR aýmaǵynda aqshalaı eseptesý kassalyq apparatty qoldana otyryp júrgiziledi jáne taýardy satý nemese qyzmet kórsetý kezinde satýshy fıskaldy chek berýge mindetti. Kásipkerler jıi jol beretin buzýshylyqtar: qolma-qol aqshamen nemese bank kartasymen tólegen kezde chekti bermeý, fıskaldy chektiń ornyna taýar chegin berý jáne jeke tulǵanyń jeke shotyna aqsha qarajatyn aýdarý bolyp tabylady. Mobıldi aýdarymdar kásipkerlik qyzmette paıdalanýǵa arnalmaǵan. Mobıldi aýdarymdar men mobıldi tólemder arasyndaǵy aıyrmashylyqty túsiný mańyzdy. Mobıldi tólemder – bul mobıldi qosymshany nemese shtrıh-kodty skanerleıtin arnaıy jabdyqty qoldana otyryp, taýarlar, jumystar men qyzmetter úshin tólem ádisi», - dep habarlady vedomstvodan.

Osyǵan oraı Almaty qalasy boıynsha MKD tutynýshylardyń quqyqtaryn qorǵaý maqsatynda azamattardy chek berýdi talap etýge shaqyrdy. Kásipkerdiń jeke shotyna aýdarymnyń ornyna, mobıldi tólemder men QR-kodty qoldaný qajet ekenin, chekti bermeý faktisi boıynsha Memlekettik kirister departamentine habarlasýdy surady.