Almatylyqtar eń uzyn quraq kórpe tigip, tarıhta qalmaq
ALMATY. QazAqparat - Almatyda eń uzyn quraq kórpe tigiledi, dep habarlaıdy QazAqparat tilshisi.
Qalalyq ákimdiktiń habarlaýynsha, eń uzyn quraq kórpe tigý jumysy Almatyda «Naýryz-2018» merekesi aıasynda qolǵa alynǵaly otyr.
«Megapolıste «Gınesstiń rekordtar kitabynyń» jańa rekordy jasalmaq. Quraq kórpeniń uzyndyǵy 25 500 sharshy metr bolady. Rekord jasalyp, sertıfıkat alynǵan soń kórpe quraqtary túrli kórmelerge qoıylady. Quraq kórpe tigý jónindegi sheberlik synybyna qatysýǵa nıet bildirýshilerdiń barlyǵy 10 naýryzdan bastap www.nauryzfest2018.kz. saıtyna tirkelýleri tıis. Ataýly shara «Naýryz-2018» atty naýryz merekesine oraı 22 naýryzda bastalyp, qyrkúıekte ótetin Almatynyń «Qala kúninde» aıaqtalady. Jobany júzege asyrý úshin qalanyń 25 kitaphanasynan kórpe elementteri qabyldanady», - deıdi uıymdastyrýshylar.
Aıta keterligi, buǵan deıingi uzyn kórpe rekordy 2000 jyly Portýgalııanyń Porto qalasynda jasalǵan. Onda uzyndyǵy 25100 sharshy metr «Manta da Cultura» kórpesi tigilgen.
«Quraq kórpeniń ár bólshegi Otanymyzdyń san alýandyǵyn: onyń dalasyn, taýy men ózenin kórsetedi, al basty sımvol - halyqtyń birligi. Qazaqstanda 130-dan astam ult turady. Kórpeniń quraqtary tutas jamylǵyǵa aınalyp, elimizdiń tutastyǵyn pash etedi», - dedi jobanyń basty uıymdastyrýshysy Almaty qalasy Mádenıet jáne muraǵattar basqarmasy.
Eske sala keteıik, 21-25 naýryz aralyǵynda saǵat tańǵy 10:00 men keshki 21:00-ge deıin megapolıstegi alańdarynda «Naýryz-2018» merekesi toılanady. Al 22 naýryzda Astana alańynda úlken kontsert, ulttyq as máziri boıynsha festıval uıymdastyrylady.
old.prosveshenie.kz saıtynan alynǵan ıllıýstratsııalyq foto
