Almatylyqtar emhanasyn aýystyra alady
ALMATY. QazAqparat - Qazaqstanda halyqty emhanaǵa tirkeý naýqany bastalady. Jyl saıyn ótkiziletin dástúrli shara bıyl 15-qyrkúıekten 15-qarashaǵa deıin ótedi. Bul týraly «Áleýmettik medıtsınalyq saqtandyrý qory» kommertsııalyq emes aktsıonerlik qoǵamy Almaty qalalyq fılıalynyń dırektory Tileýhan Ábildaev aıtty, dep habarlaıdy QazAqparat tilshisi.
Spıkerdiń sózinshe, osy joly almatylyqtar 73 bastapqy medıtsınalyq-sanıtarlyq kómek uıymyna tirkelýge múmkindik almaq. Onyń ishinde 40 emhana memlekettik, 33-i – jekemenshik klınıkalar.
«Tirkeý naýqany kezinde azamattar ózi turatyn aýmaq sheńberindegi memlekettik qana emes, jekemenshik klınıkalarǵa da tirkele alady. Ol úshin emhana Medıtsınalyq saqtandyrý qorynyń jetkizýshiler tiziminde bolýǵa tıis», – deıdi ol.
Aıta keteıik, bıylǵy naýqan barysynda emhana aýystyrǵan azamattar ózi tańdaǵan emdeý mekemesiniń qyzmetin 2022 jyldan bastap paıdalana alady. Jalpy, emhana aýystyrý mindetti emes. Burynǵy emhana qyzmetine kóńili tolatyn azamattar ári qaraı da burynǵy klınıkanyń qyzmetin paıdalana berse bolady.
Emhana ózi qyzmet kórsetetin aımaqtan tys jerde turatyn azamattardy, sondaı-aq, bastapqy medıtsınalyq-sanıtarlyq kómek kórsetetin mekeme júktemesi shekten asyp ketken jaǵdaıda tirkeýden bas tartýy múmkin. Qoldanystaǵy normatıvterge sáıkes, ýchaskedegi jalpy praktıka dárigerine tirkelgender sany 1 700-den aspaýǵa tıis.
Sonymen birge bıyl tirkeý tártibine birqatar ózgeris engizildi. Budan bylaı Eýrazııalyq ekonomıkalyq odaqqa múshe memleketterden kelgen eńbek mıgranttary emhanaǵa tirkelý úshin erikti medıtsınalyq saqtandyrý polısin satyp alýǵa tıis. Olar tirkelý úshin emhananyń tirkeý bólimine baryp ótinish jazady.
Tirkeý naýqanyna Qordyń málimetter bazasyna engen emdeý mekemeleri ǵana qatysady. Olardyń tolyq tizimimen www.fms.kz resmı saıty arqyly tanysýǵa bolady.
