Almatylyqtar elektr qýaty úshin 9 mlrd teńgege jýyq qaryz
ALMATY.QazAqparat – Almaty qalasy men Almaty oblysynyń jeke jáne zańdy tulǵalarynyń elektr energııasy úshin 9 mıllıard teńgege jýyq bereshegi bar, dep habarlaıdy QazAqparat tilshisi «AlmatyEnergoSbyt» JShS-ǵa silteme jasap.
Vedomstvo málimetinshe, qaryzy bar barlyq tutynýshyǵa elektr energııasy óshiriletini týraly habarlama jiberildi.
«AlmatyEnergoSbyt» barlyq boryshkerdi elektr qýatynan ajyratqan joq. Kompanııa Almaty qalasy ákiminiń jeke tulǵalarǵa naýryz-sáýir aılarynda tutynylǵan kommýnaldyq qyzmetter boıynsha tólemderin jyl sońyna deıin shegerý týraly bastamasyn qoldady. Osy kómekti alý úshin «AlmatyEnergoSbyt» JShS-ǵa 1542 turǵynan ótinish tústi»,– dep atap ótti JShS-nyń baspasóz qyzmetinen.
Tutynýshylardyń elektr energııasy boıynsha qaryzy 1 tamyzdaǵy jaǵdaı boıynsha 8,767 mlrd teńgeni quraıdy.
Sonymen qatar, kompanııa elektr energııasy úshin debıtorlyq bereshegi bar turǵyn úı keshenderi men basqarýshy kompanııalardyń tizimi «AlmatyEnergoSbyt» JShS saıtynda ornalastyrylǵanyn atap ótti.
«Al elektr energııasyna qaryz bolyp qalǵan turǵyndar ózderiniń bereshegin ALSECO kompanııasynan naqtylaı alady. Sonymen qatar qaryzdaryn «AlmatyEnergoSbyt» JShS kez-kelgen fılıalynda tóleı alady», – dep atap ótti kompanııadan.
