Almatylyqtar Dinmuhamed Qonaevty eske aldy
Salatanatty sharaǵa D.Qonaevtyń qyzmettes izbasarlary, memleket jáne qoǵam qaıratkerleri, soǵys jáne eńbek ardagerleri, týǵan-týystary, BAQ ókilderi, qala turǵyndary men qonaqtary qatysty.
D.Qonaevtyń eskertkishine gúl shoqtary qoıylǵan soń zııaly qaýym ókilderine sóz berildi.
2022 Dinmuhamed Ahmetuly Qonaevqa arnalǵan jyl boldy. Bul týraly Qonaev qorynyń prezıdenti Eldar Qonaev aıtty.
«Ótken jyly halyqtyń usynysymen, Prezıdent Qasym-Jomart Toqaevtyń Jarlyǵymen burynǵy Qapshaǵaı qalasyna Dinmuhamed Qonavetyń esimi berildi. Osy oqıǵadan soń elimizdiń kóp óńirinde Qonaevqa qurmet kórsetilip, eskertkishter qoıylyp, uly tulǵanyń esimi ulyqtala bastady. Osylaısha tarıhı ádildik ornady. Bıylǵy jyldy da D.Qonaevtyń 111 jyldyǵymen bastap otyrmyz. Búgin tek Almatyda ǵana emes, sonymen birge elimizdiń ár óńirinde aıtýly sharaǵa baılanysty is-sharalar ótip jatyr. Basty maqsat – Dinmuhamed Qonaevtyń esimin ony kórgen, tanyǵan, qazirgi ýaqytta azaıyp jatqan zamandastaryna ǵana emes, keıingi jastarǵa da úlgi etý, jadynda jańǵyrtý. Sebebi, bul tulǵanyń elimizdiń damýyna qosqan úlesi ólsheýsiz. Búgingi aıazǵa qaramaı uly tulǵaǵa qurmet kórsetý úshin kelgenderińiz úshin sizderge zor alǵys aıtamyn», - dedi Eldar Qonaev.
Qazaqstan jýrnalıstıka akademııasynyń vıtse-prezıdenti Valerıı Jandáýletov aldaǵy ýaqytta Dinmuhamed Qonaevqa arnalǵan 6 tom kitap jaryqqa shyǵatynyn málimdedi.
«Qazirdiń ózinde birinshi tomy basylyp shyqty. Munda jýrnalısterdiń eńbegi zor ekenin aıtýymyz kerek. Aldaǵy ýaqytta tulǵanyń ómiri men qyzmetine arnalǵan 6 tomdyq kitap jaryq kóredi. Men sizderden bul ıgi sharaǵa belsene atsalysýdy suraımyn», - dedi Valerıı Jandáýletov.
Osydan soń Túrkistan oblysynan kelgen qadirli aqsaqal Altynbek Aıdarqulov D.Qonaevtyń rýhyna quran baǵyshtady.
Saltanatty sharada budan bólek QR UQK Shekara qyzmetiniń akademııasynyń kýrsanttary «Ótkenge qurmet» aktsııasy aıasynda D.Qonaevtyń bıýstine gúl shoqtaryn qoıyp, aq kógershinderdi ushyrdy.
Keıin Qonaev mýzeıindegi ekspozıtsııaǵa jáne memorıaldy páter-mýzeıinde ekskýrsııa uıymdastyryldy.
Eske salaıyq, 111 jyl buryn (1912-1993) asa kórnekti memleket jáne qoǵam qaıratkeri, úsh márte Sotsıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymdarynyń doktory Dinmuhamed Ahmetuly Qonaev dúnıege keldi.
2022 jyly QR Prezıdenti Qasym-Jomart Toqaevtyń Jarlyǵymen Almaty oblysynyń ortalyǵy Qapshaǵaı qalasy Qonaev bolyp ózgerdi.
