Almatylyqtar Denıs Ten jaralanǵan jerge gúl shoqtaryn toqtaýsyz aparýda

Aıta keteıik, adamdar qaıǵyly oqıǵa bolǵan jerge gúlderdi sportshynyń qazasy týraly estigennen keıin ákele bastaǵan edi. Olardyń qarasy túnde de úzilgen joq.

Almatylyqtar gúl shoqtarymen qosa, shyraq jaǵyp jatyr. Sonymen qatar, turǵyndar Respýblıka saraıynyń aldyn gúlmen kómkerýde.

Qaıǵyǵa ortaqtasqan Astana turǵyndary da keshe, 19 shilde kúni Arbatqa gúlder ákele bastaǵanyn buǵan deıin habarlaǵan bolatynbyz.

Olımpıada júldegerin eske alý maqsatynda 20-23 shilde aralyǵynda Astanada qalasyndaǵy «Korean Azia» dámhanasynda úsh kún boıy as beriledi. Kelemin deýshilerge saǵat 14.00-15.00-de Satbaev kóshesi №5 úıdiń esigi ashyq.

Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn. 

2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy. 

Adam óltirý babymen qylmystyq is qozǵaldy.

Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.

25 jasynda ómiri úzilgen sportshymen qoshtasý rásimi 21 shilde kúni Almatydaǵy Balýan Sholaq atyndaǵy sport saraıynda ótedi. Bastalýy - saǵat 10:00-de.