Almatylyqtar Coursera platformasynda aqpan aıyna deıin tegin oqı alady
ALMATY. QazAqparat – Soursera platformasynda tegin oqý aqpan aıyna deıin uzartyldy. Bul týraly Óńirlik kommýnıkatsııalar qyzmeti alańynda ótken onlaın brıfıng barysynda Almaty qalasy Tsıfrlandyrý basqarmasynyń basshysy Baıan Qońyrbaev aıtty, dep habarlaıdy QazAqparat tilshisi.
Eske salaıyq, Almatynyń Tsıfrlandyrý basqarmasy men Jumyspen qamtý ortalyǵy Coursera kompanııasymen álemniń jetekshi ýnıversıtetterinen tegin túrde 5000 adamǵa kýrstan ótýge múmkindik berý týraly kelisimge qol qoıǵan bolatyn.
«Buǵan deıin ótinim berý merzimi qazan aıynyń sońyna deıin bolsa, sabaqtardy tegin paıdalaný múmkindigi 31 jeltoqsanǵa deıin berilgen edi. Al qazir tegin oqý múmkindigi 2021 jyldyń aqpanyna deıin uzartyldy. Bul múmkindik bıylǵy qazan aıynyń sońyna deıin tirkelgen adamdar úshin qoljetimdi. Bul baǵdarlama óte jaqsy nátıje kórsetip otyr, osyǵan baılanysty ony uzartý týraly sheshim qabyldadyq. Bul úzdik ýnıversıtetter men iri álemdik kompanııalardyń dıplomdaryn, sertıfıkattaryn alýdyń tamasha múmkindigi», - dep atap ótti B.Qońyrbaev.
Onyń aıtýynsha, almatylyqtar orta eseppen 2 kýrstan ótedi, bul jas mamandardyń kásibı damýǵa jáne eńbek naryǵyndaǵy básekege qabilettiligin arttyrýǵa degen qulshynystary men suranystarynyń baryn bildiredi.
