Almatylyqtar Chernobyl apatynyń saldaryn joıýǵa qatysqan jaýyngerlerdi eske aldy
Almaty. QazAqparat - Almaty qalasynda Chernobyl apatyn joıýǵa qatysqan jaýyngerlerdi eske alý sharasy ótti, dep habarlaıdy QazAqparat tilshisi.
Sharaǵa Chernobyl apaty kezinde qala turǵyndaryn qaýipsiz aımaqqa kóshirý jáne aýmaqty zalalsyzdandyrý protsesterine atsalysqan qazaqstandyq joıýshy-jaýyngerler qatysty.
«Bul barlyq postkeńestik elder úshin ortaq qasiret. Sol jyly men stýdent edim. Apat kezinde jaýyngerler óz mindetin joǵary deńgeıde atqardy. Al qarapaıym azamattar, onyń ishinde, aspazdan bastap daıashyǵa deıin sol jaýyngerlerdi qamtamasyz etý úshin qolynan kelgenshe kómektesti. Olardyń erlikterin eske alý biz úshin mindet», - deıdi Reseıdiń Qazaqstandaǵy konsýly Irına Pereverzeva.
Aıta ketsek, Almaty qalasynda Chernobyl apatyn joıýshy-jaýyngerlerdi eske alý eskertkishi ótken jyly apattyń oryn alǵanyna 30 jyl tolýy qurmetine ashyldy. Al búgin apatqa 32 jyl tolyp otyr.
