Almatylyqtar BRT júrdek avtobýstaryn testileı bastady
ALMATY. QazAqparat - Almatyda BRT júrdek avtobýstar jolynyń alǵashqy jelisi paıdalanýǵa berildi, dep habarlaıdy QazAqparat tilshisi.
Mundaı jańashyldyq Orbıta shaǵyn aýdanynyń turǵyndarynda ekiudaı pikir týǵyzyp jatyr. Qoǵamdyq kólikpen qatynaıtyn azamattar qýanysh bildirip jatsa, avtojúrgizýshiler narazy bolyp otyr.
Olardyń aıtýynsha, Əl-farabıden Jandosov kóshesine deıingi Mustafın, Rysqulbekov, Súleımenov kóshelerimen júrý múlde yńǵaısyz. Jeke kólikterge tek 1 jolaqtan ǵana jol qaldy.
Qalalyq Jolaýshylar kóligi jáne avtomobıl joldary basqarmasynyń habarlaýynsha, BRT jolaǵy ázirge testilik rejimde paıdalanylatyn bolady.
1 jeltoqsannan bastap júıe tolyǵymen jumys jasaıdy.
«Qazirgi tańda Ál-farabıden Jandosov kóshesine deıingi Mustafın, Rysqulbekov, Súleımenov kóshelerinde jalpy uzyndyǵy 2,7 km bolatyn jolaq jasalyp jatyr. Jolaq joldyń ortasynda, ıaǵnı eń shetki sol jaqta ornalasady. Biraq Súleımenov kóshesiniń Pıatnıtskııden Jandosov kóshesine deıingi aralyǵy avtobýstar oń jaq jolaqpen, kólikter - shetki sol jolaqpen júretin bolady», - dedi basqarmanyń jol ınfraqurylymy bóliminiń basshysy Ernur Abjahan.
Onyń aıtýynsha, júrdek avtobýs jelisin engizý birinshi kezekte jolaýshylardyń qaýipsizdigi úshin jasalady.
"Bul bizdiń elimizdegi biregeı joba. BRT júıesinde aıaldamalar joldyń sol jaǵynda ornalasady. Jolaýshylarǵa arnalǵan arnaıy jolaqtar salynady. Búginde ınfraqurylymdy jetildirý, jol belgilerin syzý, baǵdarsham ornatý jumystary jasalyp jatyr. Rekonstrýktsııa jumystary aıaqtalǵan soń nətıje anyq bolady. Birinshi jeli 1 jeltoqsanda paıdalanýǵa tolyq beriledi",- dedi ol.
Onyń aıtýynsha kelesi jyly BRT joly Jandosov-Tımırıazev, Tımırıazev- Jeltoqsan kóshelerinde jalǵasady. Tımırıazev kóshesinde arnaıy jolaq kósheniń ortasynda bolady. Atalǵan ýchaske aıaqtalǵan soń 2018 jyldyń aıaǵyna taman BRT jalpy uzaqtyǵy 8,7 km bolmaq»,- dedi Ernur Abjahan.
Atalǵan jolaqpen tek qoǵamdyq kólik qana júredi. Arnaıy júrdek avtobýstar 2018 sońynda jolǵa shyǵady.
BRT jolynyń kelesi jelisiniń qurylysy 2019 jyly bastalady.
Jol Jeltoqsan Tımırıazev kóshesinen Tóle bı arqyly Shyǵys aınalma jolǵa shyǵyp Qulja tas jolymen Shyǵys avtovokzalyna deıin sozylady. Joldyń uzyndyǵy 22,4 shaqyrym bolmaq.
Qazir ekinshi kezek boıynsha jobalyq smetalyq qujattama jasalyp jatyr.
