Almatylyqtar bıznes-jobalaryn iske asyrýǵa grant alady
ALMATY. QazAqparat – Almatylyqtar ózderiniń bıznes-jobalaryn iske asyrýǵa 556, 6 myń teńgeden grant alady, dep habarlaıdy QazAqparat tilshisi.
Qalalyq jumyspen qamtý ortalyǵynyń dırektory Dılıara Imanqulova brıfıng barysynda atap ótkendeı, memlekettik granttar jańa bıznesti ashqan nemese jolǵa qoıýdy kózdegen tulǵalarǵa óteýsiz jáne qaıtarymsyz negizde beriledi.
«Qalalyq basqarý qurylymdary karantın sharalary aıaqtalǵannan keıin jumyssyz qalǵan azamattardy qoldaýdyń birqatar jolyn ázirlep otyr. Máselen, halyqty jumyspen qamtý ortalyǵy arqyly jumysqa ornalastyrýdan bólek, bastapqy bıznesti iske asyrýdy josparlap otyrǵan adamdarǵa óteýsiz jáne qaıtarymsyz negizde memlekettik granttar berilmek. Ótken jyly mundaı granttardy bizde 2867 adam aldy. Bıyl 1705 adamǵa 200 AEK kóleminde qarajat bólindi (555,6 myń teńge, 1 AEK – 2778 tg). Sonyń ishinde 706 almatylyqa granttar osy aıda beriledi»,– deıdi Dılıara Imanqulova.
Spıkerdiń aıtýynsha, «Eńbek» baǵdarlamasyna qatysýshylar memlekettik granttardy alýǵa úmitkerler bola alady.
«Bul tizimge tehnıkalyq jáne kásiptik, orta bilimnen keıingi bilim berý, joǵary nemese joǵary oqý ornynan keıingi bilim berý uıymdarynda, «Bastaý bıznes» jobasy boıynsha kásipkerlik negizderine oqytý kýrstarynan ótkender ǵana engiziledi. Sonymen qatar, «Eńbek» baǵdarlamasynyń birinshi baǵyty sheńberinde oqýdy aıaqtaǵan jáne buryn basqa memlekettik baǵdarlamalar aıasynda granttar almaǵan tulǵalar, sondaı-aq qonys aýdarýshylar, ataýly áleýmettik kómek alýshylar,kópbalaly otbasylar qatysa alady. Jańa bıznes-ıdeıalardy iske asyrýǵa memlekettik granttar 200 eselengen aılyq eseptik kórsetkishke deıingi mólsherde beriledi. Az qamtylǵan jáne kópbalaly otbasylarǵa,eńbekke jaramdy múgedekter men jastarǵa memlekettik granttardy alýǵa basymdyq beriledi»,– dedi D.Imanqulova.
Sonymen qatar ol kásipkerlik bastamalardy qoldaýǵa arnalǵan baǵdarlamaǵa qatysýshylar 8 myń AEK kóleminde shaǵyn nesıe ala alatynyn tilge tıek etti.
«Bul 21 mln teńgeden astam qarajat degen sóz. Bıyl osyndaı 140 jobaǵa aqsha bólindi. Alǵashqy úmitkerler búginge deıin 14 shaǵyn nesıeni alyp úlgerdi»,– dep qortyndylady Almaty qalasy halyqty jumyspen qamtý ortalyǵynyń dırektory.
