Almatylyqtar Bilim kúnin velosherý jáne fýtbol lıgasymen atap ótti
ALMATY. QazAqparat - Almatylyqtar Bilim kúnin velosherý jáne fýtbol lıgasymen atap ótti, dep habarlaıdy QazAqparat tilshisi.
Aqparattyq jáne sportyq HAB-tyń habarlaýynsha, bul kúni «Sporttyq Almaty» baǵdarlamasy aıasynda apta saıyn ótetin velosherý Bilim kúnine arnalyp, aýla komandalary fýtboldan baq synady.
«Nurly Taý» bıznes ortalyǵynan bastalyp, ál-Farabı atyndaǵy Qazaq Ulttyq Ýnıversıteti stadıonynda aıaqtalǵan 11 shaqyrymdyq qashyqtyqty 800-ge jýyq adam baǵyndyrdy.
Olardyń arasynda Ystyq kólden Almatyǵa 500 shaqyrym júrip kelgen «Sheksiz sport» velomarafonynyń qatysýshylary da bar.
Jeńimpazdarǵa baǵaly syılyqtar men velosıped oınatyldy, velosherýdiń demeýshisi «Officeair» kompanııasynyń atynan sertıfıkattar tabystaldy. 17-jastaǵy almatylyq Ramazan Qurbanov velosıped utyp aldy.
«Men bul velosherýge alǵash ret kelgen edim, kútpegen jerden velosıped uttym. Qýanyshtymyn. Uıymdastyrýshylarǵa alǵys aıtamyn. Aldaǵy ýaqytta qaldyrmaı kelýge tyrysamyn», - dedi Ramazan Qurbanov.
Sonymen qatar, belsendilik tanytyp, erekshe kózge túsken almatylyqtar «Sporttyq Almaty» usynǵan arnaıy fýtbolkalar men qyrkúıektiń 9-i kúni «Almaty Arenada» ótetin jekpe-jek keshine arnalǵan bılet utyp aldy. Olar «Alashpride» sportshylarymen sýretke tústi.
Al, osy sharamen qatarlasyp ótken aýla komandalary arasyndaǵy teńbil dop dodasyna 1000-ǵa jýyq bala men eresek adamdar qatysty.
Jarystyń qorytyndysy boıynsha, «A» lıgasynda 64 komandanyń arasynda «Krıstal Pelas», «Imperator» jáne «Maıamı» ujymdary júldeli oryndarǵa ıe bolsa, «B» lıgasynda «Arlans», «Tastaq», «Arsenal» oıynshylary 56 komanda ishinen úzdikter qatarynan kórindi. Olar medal, dıplom jáne osy jarystyń demeýshisi «Maxi chaı» kompanııasynyń sýsyndarymen marapattaldy.
«Búgingi bizdiń oıynymyz óte áserli ári keremet boldy dep oılaımyn. Ár jarys saıyn tek jeńiske umtylamyz. Ylǵı da fýtbol oıyndaryna daıyndyqpen kelemiz. Bul jeńisimiz sońǵy emes degen senimdimin», - dedi «Krıstal Pelas» komandasynyń oıynshysy Aslan Tólegen.
Aıta keter jaıt, «Sporttyq Almaty» baǵdarlamasy megapolıstegi buqaralyq sportty damytý maqsatynda júzege asyrylýda.
