Almatylyqtar Berdibek Saparbaevty aqtyq saparǵa shyǵaryp saldy
ALMATY. QazAqparat - Almatyda Abaı atyndaǵy qazaq memlekettik akademııalyq opera jáne balet teatrynda memleket jáne qoǵam qaıratkeri Berdibek Saparbaevpen qoshtasý rásimi ótti, dep habarlaıdy QazAqparat tilshisi.
Marqummen qoshtasýǵa Qazaqstan Respýblıkasy Premer-Mınıstri Álıhan Smaıylov, týǵan-týystary, dostary, áriptesteri men dostary, memleket jáne qoǵam qaıratkerleri qatysty.
Qoshtasý rásiminde sóz sóılegen Álıhan Smaıylov Qazaqstan Prezıdenti Qasym-Jomart Toqaevtyń kóńil aıtý hatyn oqydy.
«Kórnekti memleket jáne qoǵam qaıratkeri Berdibek Mashbekuly Saparbaevtyń dúnıeden ótýine baılanysty qaıǵyra kóńil aıtamyn. Berdibek Mashbekuly uzaq jylǵy eseli eńbek jolynda laýazymdy qyzmetterdi abyroıly atqaryp, elimizdiń saıası-ekonomıkalyq, áleýmettik-mádenı órkendeýine jáne óńirlerdi damytýǵa mol úles qosqan edi. Memleketimizdiń syndarly saıasatyn úlken biliktilikpen júrgize bilip, Qazaqstannyń bedeli men mártebesiniń arta túsine qajyr-qaıratyn jumsady. Azamattyq qadir-qasıetimen el ishinde qurmetke bólendi. Sońyna óshpes iz qaldyrǵan Berdibek Mashbekulynyń esimi men jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn», — delingen Memleket basshysynyń kóńil aıtý hatynda.
Óz kezeginde Premer-Mınıstr Úkimet músheleri jáne óziniń atynan kóńil aıtty.
«Berdibek Mashbekuly óziniń eńbegimen elimizdiń ósip-órkendeýine úlken úles qosty. Qaı qyzmette bolsyn, halyq múddesine bar kúsh-jigerin jumsap eńbek etti. Berdibek Mashbekulynyń eren eńbegi men jarqyn beınesi halyq esinde máńgi saqtalady», — dedi Álıhan Smaıylov.
Berdibek Saparbaev Keńsaı zıratyna jerlenedi.
Eske sala keteıik, 10 maýsym kúni memleket jáne qoǵam qaıretkeri Berdibek Saparbaev 70 jasynda ómirden ozdy.
Prezıdent Qasym-Jomart Toqaev kórnekti memleket jáne qoǵam qaıratkeri Berdibek Saparbaevtyń dúnıeden ótýine baılanysty otbasy men jaqyn týystaryna kóńil aıtý jedelhatyn joldady.
Berdibek Mashbekuly 1953 jyly 9 aqpanda Qyzylorda oblysy Jańaqorǵan aýdanynyń Besaryq aýylynda týǵan.
1977 jyly Almaty Halyq sharýashylyǵy ınstıtýtyn «Ekonomıka jáne materıaldyq-tehnıkalyq jabdyqtaý» mamandyǵy boıynsha bitirdi.
Ekonomıka ǵylymdarynyń doktory, professor.
Berdikbek Saparbaev ár jyldary Qazaqstannyń bes oblysyn, ıaǵnı Qyzylorda, Ońtústik Qazaqstan, Shyǵys Qazaqstan, Aqtóbe jáne Jambyl oblystaryn basqardy.
Saparbaev eki ret Premer-Mınıstrdiń orynbasary qyzmetin atqardy.
«Qurmet» (1999), «Parasat» (2007) ordenderimen, «Astana» (1998), «Qazaqstan Respýblıkasynyń táýelsizdigine 10 jyl» (2001), «Qazaqstan Respýblıkasynyń Konstıtýtsııasyna 10 jyl» (2005) medaldarymen marapattalǵan.
