Almatylyqtar Báıken Áshimovtiń 100 jyldyǵyn atap ótti
ALMATY. QazAqparat - Almatylyqtar maıdanger, tanymal qoǵam qaıratkeri, 1970-84 jyldary Qazaq KSR Mınıstrler Keńesiniń tóraǵasy, 1984-85 jyldar aralyǵynda Qazaq KSR Joǵarǵy Keńesi Prezıdıýmynyń tóraǵasy, Sotsıalıstik Eńbek Eri (1977 jyly) bolǵan Báıken Áshimuly Áshimovtiń 100 jyldyǵyn atap ótti, dep habarlaıdy QazAqparat tilshisi.
Abaı atyndaǵy Opera jáne balet teatrynda qoǵam qaıretkeriniń 100 jyldyǵyna arnalǵan aýqymdy saltanatty shara uıymdastyryldy. Kesh B.Áshimovtiń ómiri men eńbek jolyna arnalǵan derekti fılmmen bastaldy. Almaty qalasynyń ákimi Baýyrjan Baıbek Báıken Áshimovtiń 100 jyldyǵymen quttyqtap, onyń ónegeli ómir jolyna toqtaldy.
«Búgin asa kórnekti, memleket jáne qoǵam qaıratkeri, búkil sanaly ǵumyryn eline arnaǵan Báıken Áshimuly Áshimovtiń 100 jyldyǵyna arnalǵan saltanatty keshte bas qosyp otyrmyz. Báıken Áshimov el múddesin kózdegen kóptegen ıgilikti isterdiń basy-qasynda boldy, Keńester odaǵyndaǵy Mınıstrler keńesiniń eń bedeldi tóraǵasy retinde tanyldy. Mınıstrler keńesi qyzmetinde júrip, sol kezeńde mınıstrliktiń kún tártibinde turǵan respýblıkadaǵy kásiporyndardy elektrlendirý, mehanıkalandyrý jáne óndiristi avtomattandyrý syndy asa mańyzdy mindetterdi júzege asyrdy. Jańa tehnologııalar engizdi. Kólik, energetıka, hımııa jáne jeńil ónerkásip, mashına jasaý salalary qarqyndy damyp, Qazaqstan ekonomıkasy jaǵynan Odaq kóleminde eń aldyńǵy qatardaǵy elge aınaldy. Bul qyzmetti ol úzdiksiz 14 boıy abyroımen atqaryp, Keńester odaǵyndaǵy áriptesteri ishinen jalǵyz ózi Sotsıalıstik Eńbek Eri ataǵyna ıe boldy. Elimiz Táýelsizdik alǵan jyldary Báıken aǵamyz, óziniń mol tájirıbesimen, zor bedelimen Elbasynyń senimdi keńesshileriniń biri boldy. Táýelsiz Qazaqstannyń «Parasat», «Otan» ordenderimen marapattaldy», - dedi ákim. 
Keshte Baýyrjan Baıbektiń quttyqtaýynan keıin QR Parlamenti Májilisiniń tóraǵasy Nurlan Nyǵmatýlınniń quttyqtaýyn Májilis depýtaty Záýresh Amanjolova oqyp berdi. Onda Báıken Áshimovtiń ultyna degen súıispenshiligi erekshe bolǵany atap ótilgen. 
«Sol kezeńderde Báıken Áshimov joǵary minberlerde sóılegen sózinde Uly Abaı atamyzdyń danalyǵyn eske alyp, respýblıka kóleminde ótken jıyndarda alǵashqylardyń biri bolyp, qazaq tilinde baıandama jasaýy, onyń ultyna degen erekshe qurmetiniń belgisi edi», - dedi Záýresh Amanjolova quttyqtaý hatty oqı otyryp.
Jıynda Báıken Áshimovtiń zamandasy Keńes Aýhadıev ta óz estelikterimen bólisti.
«Sonsha qyzmet atqaryp, uzaq ómir súrip, 93 jasynda qaıtty. Mine, 100-ge tolǵanyn barlyǵymyz atap ótip otyrmyz. Men Almatyny basqarýǵa kelgenimde Báıken Áshimovpen kezdestim. Onyń adamgershilik qasıeti, jan tynyshtyǵy, oılampazdyǵy, oılanyp baryp qorytyndylaıtyn erekshe adal minezin eske alǵym keledi», - dedi Keńes Aýhadıev esteliginde.
Quttyqtaý sózder men estelikterden keıin, kórermenge arnalyp kontserttik baǵdarlama usynyldy. Keshte tyń ıgerý kezinde, soǵystan keıingi ýaqyttaǵy ánder, kompozıtor Shámshi Qaldaıaqovtyń shyǵarmalary oryndaldy.
Báıken Áshimov 2010 jyldyń 5 aqpanynda 93 jasynda baqılyq boldy.
