Almatylyqtar balalaryn qaýipti aýrýlardan saqtaıtyn qandaı vaktsınalardy ala alady

ALMATY. QazAqparat- Óńirlik kommýnıkatsııalar qyzmeti alańynda ótken brıfıngte Almaty qalasynyń sanıtarlyq-epıdemıologııalyq baqylaý departamenti basshysynyń orynbasary Ásel Qalyqova júrgizilip jatqan ımmýnoprofılaktıka jaıly aıtty, dep habarlaıdy QazAqparat tilshisi.

Onyń aıtýynsha, jalpy qala boıynsha 2022 jyldyń 9 aıynda qajetti deńgeıde profılaktıkalyq egýler júrgizilgen.

«Atap aıtar bolsam, 4 aılyq balalardy kókjótelge, dıfterııaǵa, sirespege, V vırýsty gepatıtine, gemofıldi ınfektsııaǵa jáne polıomıelıtke qarsy (AbKDS3) qamtý– 73,9%, 12-15 aılyq balalardy pnevmokokktyq ınfektsııaǵa qarsy egý Pnevmo3- 72,5%, 12-15 aılyq balalardy qyzylshaǵa, qyzamyqqa, parotıtine qarsy QQP1- 76,1%, 6 jastaǵy balalardy qyzylshaǵa, qyzamyqqa, parotıtine qarsy QQP2 qaıta egý – 71,7%, 6 jastaǵy balalardy kókjótelge, dıfterııa, sirespege qarsy (býstrıks AbKDS5) -71,1%, 18 aılyq balalardy kókjótelge, dıfterııaǵa, sirespege, polıomıelıtke, gemofıldi ınfektsııaǵa qarsy (AKDS4) qamtý – 70,4%, 16 jastaǵy jasóspirimderdiń dıfterııa men sirespege qarsy ADS-M vaktsınasymen egý -69,7%, dıfterııa men sirespege qarsy eresekterdi ADS-M vaktsınasymen egý - 90,5% qurady»,- deıdi spıker.

Sonymen qatar, ol perzenthanalarda jańa týǵan nárestelerdi «V vırýsty gepatıtine» qarsy ekpemen qamtý- 86,1% jáne týberkýlezge qarsy – 86,1% paıyz bolǵanyn atap ótti.

«Ýaqytsha medıtsınalyq qarsy kórsetilimder men ata-analardyń vaktsınatsııadan bas tartýy jańa týǵan nárestelerdi vaktsınatsııamen jetkiliksiz qamtýdyń negizgi sebepteri bolyp qalyp otyr», - dedi Ásel Qalyqova.